Ազատության հրապարակը «պահում են» սպորտային միջոցառումների համար

Փետրվարի 15-ից մարտի 10-ը Ազատության հրապարակում սպորտային միջոցառումներ կանցկացվեն, հայտնում է Քաղաքապետարանի պաշտոնական կայքը:

Քաղաքապետարանն ի գիտություն է ընդունել քաղաքապետարանի աշխատակազմի սպորտի բաժնի պետի իրազեկումը` տվյալ ժամանակահատվածում Ազատության հրապարակում սպորտային  միջոցառումներ  անցկացնելու վերաբերյալ:

Մեկ այլ որոշմամբ` ընդունվել է ի գիտություն Երևանի քաղաքապետարանի աշխատակազմի մշակույթի և տուրիզմի վարչության պետի  իրազեկումը` 2011 թվականի փետրվարի 15-ից մարտի 15-ը Ազատության հրապարակում մշակութային  միջոցառումներ  անցկացնելու վերաբերյալ:

Ավելի վաղ Հայ Ազգային Կոնգրեսը հայտարարել է փետրվարի 18-ին Ազատության հրապարակում հանրահավաք անցկացնելու մտադրության մասին: Համապատասխան հայտ այսօր առավոտյան ներկայացվել է քաղաքապետարան:

Հիշեցնենք, որ քաղաքապետարանի կողմից հերթական մերժումը ստանալու հավանականության մասին հարցին ՀԱԿ համակարգող Լևոն Զուրաբյանը ուրբաթ օրը կայացած մամուլի ասուլիսին հայտարարել էր. «Թող մերժեն, էդ ժամանակ մենք մեր քայլերը կմտածենք»: