Հանցագործը Սիսիանում կրակոցներ է արձակել ոսկյա զարդերի խանութում

Մարտի 13-ին, ժամը 21.35-ին, ոստիկանության Սիսիանի բաժնում ահազանգ էր ստացվել, որ Սիսիան քաղաքի Գայի փողոցում գտնվող խանութում կրակոցի ձայներ են լսվում:

Դեպքի վայր մեկնած օպերատիվ խումբը պարզել է, որ գողության համար նախկինում դատապարտված, 38-ամյա Աշոտ Մ.-ն՝  դիմակավոր և զինված  «ԱԿՄ» տիպի 7.62 մմ տրամաչափի ինքնաձիգով, ժամը 21.30-ի սահմաններում մուտք է գործել նշված խանութ և փորձել հափշտակել այնտեղ վաճառվող ոսկյա զարդերը, սակայն հանդիպելով տնօրենի և աշխատակցի դիմադրությանը` ինքնաձիգից անկանոն կրակոցներ է արձակել, հայտնում է ոստիկանության մամուլի ծառայությունը:

Ոստիկանության ծառայողների ձեռնարկած միջոցառումների շնորհիվ Աշոտ Մ.-ն վնասազերծվել և բերման է ենթարկվել:

Հարուցվել է քրեական գործ` ավազակային հարձակման հատկանիշներով: