Գանդիի խոսքն ու Հախվերդյանի երգը. Հովհաննիսյանը դադարեցրեց հացադուլը

ԱԺ պատգամավոր, «Ժառանգություն» կուսակցության նախագահ Րաֆֆի Հովհաննիսյանն այսօր Ազատության հրապարակում հայտարարել է հացադուլը դադարեցնելու մասին:

Հիշեցնենք, որ նա հացադուլ էր իրականացնում մարտի 15-ից:

Ազատության հրապարակում ժամը 17:00-ի սահմաններում հավաքված համակիրների և լրագրողների առջև հնչեցրած իր ելույթը Հովհաննիսյանը սկսել է Մահաթմա Գանդիի խոսքերով.  «Նախ անտեսում են քեզ, հետո` արհամարում, ապա` հարձակվում քո վրա, հետո դու հաղթում ես»:

Հովհաննիսյանը նշել է, որ իր «Ծոմ Ազատությանը» նվիրում է Հայաստանի Հանրապետության և Արցախի ազատամարտի երկրորդ տասնամյակի տարեդարձին: Նա հավելել է, որ ավարտում է ծոմի առաջին արարը. վաղը լրանում է իր դստեր` Շուշիի 18-ամյակը, և ինքը ցանկանում է իր ընտանեկան պարտքը մատուցել, քանզի վերջին օրերին թերացել է իր հայրական պարտականությունների կատարման մեջ:

«Ազատության այս քաղաքացիական սրբավայրը դարձել է նույն արժեքների հավաքատեղի` ազատություն, ինքնիշխանություն, արժանապատվություն: Քաղաքականության և հասարակության մեջ մենք տեսնում ենք, որ ապրել ենք ոգու և գիտակցության բարձրացման մի հանգրվան, այլևս ժամանակն է, որ ՀՀ քաղաքացիները գիտակցեն, որ իրենք են մեր պետականության ապագա սերունդները: Բանավեճերի, զորակցության, այցերի, երգի ու պարի միջոցով մեր ժողովուրդը պահանջում է իշխանության վերադարձը թե ընտրական միջոցով, թե` ըստ էության: Այս ամեն ինչն արդեն օրակարգում է և անհրաժեշտ է, որ առաջիկա շաբաթներին այն, ինչ կա, լինի շարունակական», – ասել է Հովհաննիսյանը:

Նա նշել է նաև, որ կարևորն իր հացադուլի օրերին հավաքվող մարդկանց ոչ թե քանակն է, այլ որակը:

Պատգամավորի խոսքից հետո Ազատության հրապարակում ներկա հոգևորականն աղոթք կարդաց, օրհնեց իր ձեռքի հացը, որից հետո խնդրեց Րաֆֆի Հովհաննիսյանին ճաշակել այն:

Ներկաները ծափահարեցին, ողջունեցին Հովհաննիսյանի որոշումը, որից հետո հայտարարվեց, որ այսօր հրապարակում համերգով հանդես կգա Ռուբեն Հախվերդյանը: Այս պահին համերգն արդեն մեկնարկել է:

Հիշեցնենք, որ Հախվերդյանը երկու օր առաջ եկել էր Ազատության հրապարակ` զորակցելու Րաֆֆի Հովհաննիսյանին: