«Գանձասարն» առաջին պարտությունը կրեց Հայաստանի առաջնությունում

Հայաստանի ֆուտբոլի առաջնության բարձրագույն խմբում մայիսի 14-ին և 15-ին կայացան 9-րդ տուրի հանդիպումները, որոնք անցան հետաքրքիր և համառ պայքարում: Տուրի կենտրոնական հանդիպումը կայացավ Կապանում, որտեղ տեղի «Գանձասարն» ընդունել էր վերջին 10 տարիների անփոփոխ չեմպիոն «Փյունիկին»:

Առանց պարտությունների ընթացող կապանցիներն այս անգամ չկարողացան դիմակայել մրցակցին: Հանդիպման ելքը վճռեցին Հայաստանի հավաքականի ֆուտբոլիստները. 26-րդ րոպեին գոլի հեղինակ դարձավ Գևորգ Ղազարյանը, առաջին խաղակեսի ավելացված րոպեին` Մարկոսը, իսկ հանդիպման վերջին րոպեին հյուրերի հաղթանակն ամրապնդեց Էդգար Մանուչարյանը: Դաշտի տերերի կազմում աչքի ընկավ նախկին «փյունիկցի», հայկական ֆուտբոլի վետերան Արսեն Ավետիսյանը: Հաղթանակը հնարավորություն տվեց «Փյունիկին» շրջանցել կապանցիներին և ամրապնդվել երկրորդ տեղում:

Հայաստանի առաջնության առաջատարը` «Ուլիսը», 1:0 հաշվով պարտության մատնեց «Բանանցին»: Միակ գոլի հեղինակ դարձավ Արտակ Գրիգորյանը:

9-րդ տուրից հետո կրկին ուրվագծվեց երկբևեռ մրցաշարային աղյուսակը, որտեղ երկու բևեռներն անհավասար են բաշխվել: Առաջին հինգ թիմերը` «Ուլիսը», «Փյունիկը», «Գանձասարը», «Միկան» և «Իմպուլսն» պոկվել են վերջիրն եռյակից, որի կազմում են «Շիրակը», «Բանանցը», «Արարատը»:

Մրցաշարային աղյուսակ.

Ուլիս 9 խաղ, 20 միավոր

Փյունիկ 9, 17

Գանձասար 9, 16

Միկա 9, 14

Իմպուլս 9, 14

Շիրակ 9, 9

Բանանց 9, 6

Արարատ 9, 2

9-րդ տուրի տեխնիկական արդյունքներ.

Մայիս 15

«Ուլիս»-«Բանանց» 1:0 (0:0)
Երևան, «Հրազդան» մարզադաշտ
Մրցավար` Գևորգ Եղոյան
Գոլը` Արտակ Գրիգորյան, 71

«Իմպուլս»-«Շիրակ» 2:1 (1:0)
Աբովյան, «Քաղաքային» մարզադաշտ
Մրցավար` Սուրեն Բալիյան
Գոլերը` Հովհաննես Գոհարյան, 39, 58 («Իմպուլս»), Մկրտիչ Նալբանդյան, 64 («Շիրակ»)

«Գանձասար»-«Փյունիկ» 1:3 (1:2)
Կապան, «Գանձասար» մարզադաշտ
Մրցավար` Արման Ամիրխանյան
Գոլերը` Արսեն Ավետիսյան, 37 («Գանձասար»), Գևորգ Ղազարյան, 26, Մարկոս Պիզելի, 45+1, Էդգար Մանուչարյան, 90 («Փյունիկ»)

Մայիս 14

«Միկա»-«Արարատ» 2:1 (1:0)
Երևան, «Միկա» մարզադաշտ
Մրցավար` Անդրանիկ Արսենյան
Գոլերը` Նարեկ Բեգլարյան, 30, Ռաֆայել Ղազարյան, 88 («Միկա»), Արա Հակոբյան, 90+1 («Արարատ»)