Epress.am Լուրեր Հայաստանից
Մայիսի 15-ին ավարտվեց 5-րդ IT Cup ֆուտզալի մրցաշարը: 3-րդ տեղի համար խաղում «Mentor»-ը 3:1 հաշվով հաղթեց Synopsys SEG թիմին, իսկ ահա եզրափակիչ հանդիպումն ավելի համառ պայքարում անցավ: Խաղադաշտ դուրս եկած Beeline և Questrade/Epress.am թիմերը չէին ցանկանում զիջել միմյանց: Պայքարը ծավալվել էր դաշտի ամեն մետրի համար: Հիմնական ժամանակն ավարտվեց 0:0 հաշվով, իսկ լրացուցիչ 10 րոպեների ընթացքում լարվածությունը հասավ գագաթնակետին:
Առաջին 5 րոպեների ընթացքում Beeline-ը երկու լավ հնարավորություն կորցրեց, այնուհետև երկու պահ չիրացրեց Questrade/Epress.am-ը: Թիմերը մեկ ժամվա ընթացքում այդպես էլ չկարողացան գեթ մեկ գնդակ խփել` գրանցելով մրցաշարի միակ գոլազուրկ ոչ-ոքին:
6-մետրանոց հետխաղյա հարվածաշարում 3:2 հաշվով հաղթեց Questrade/Epress.am-ը և տիրացավ գավաթին:
Մրցաշարի լավագույն ռմբարկու և լավագույն ֆուտբոլիստ ճանաչվեց Questrade/Epress.am-ի հարձակվող Դավիթ Արյանը: Լավագույն պաշտպանի կոչումը շնորհվեց Beeline-ի ֆուտբոլիստ Հովհաննես Ղազարյանին, իսկ լավագույն դարպասապահ դարձավ նույն թիմի խաղացող Հարություն Տոնոյանը: Անփոխարինելի ֆուտբոլիստի մրցանակը ստացավ Creedence թիմի խաղացող Վահան Ղազարյանը:
