Լիբիայի մայրաքաղաքը կրկին ռմբակոծվել է

Մայիսի 24-ին վաղ առավոտյան ՆԱՏՕ-ի ռազմական ինքնաթիռները կրկին ռմբակոծման են ենթարկել Լիբիայի մայրաքաղաք Տրիպոլին:

Associated Press-ի փոխանցմամբ՝ սա ամենախոշոր հարձակումն է Լիբիայի մայրաքաղաքի վրա միջազգային կոալիցիայի ռազմական գործողությունների իրականացման ողջ ընթացքում:

Այս գիշեր Տրիպոլիում նվազագույնը 12 հզոր պայթյուններ են հնչել: Կառավարության խոսնակ Մուսա Իբրահիմի խոսքով`ռմբակոծության հետևանքով 3 մարզ է զոհվել, ևս 150-ը վիրավորվել են, հայտնում է «Ալ Ջազիրան»:

Իբրահիմը նշել է, որ ռմբակոծման թիրախ են դարձել այն շինությունները, որտեղ տեղակայված են Քադաֆիի բանակին օգնող կամավորների ջոկատները: Պայթյուններ են եղել նաև այն հյուրանոցի մոտ, որտեղ ժամանակավորապես բնակվում են արտասահմանյան լրագրողները:

«Սա ռմբակոծելու և սպանելու ևս մեկ գիշեր էր»,- լրագրողներին ասել է Իբրահիմը:

Միաժամանակ ՆԱՏՕ-ի ուժերը հայտարարում են, որ ռմբակոծում են բացառապես ռազմական օբյեկտները: