Տիգրան Կարապետյանի միավորումը մտադիր է վերջ դնել կլանաօլիգարխային ռեժիմին

«Ժողովրդական կուսակցության» նախագահ, փակված «ԱԼՄ» հեռուստաալիքի սեփականատեր Տիգրան Կարապետյանի ստեղծած «Ժողովրդահայրենասիրական ուժերի միավորման (ԺՀՈՒՄ) համակարգող խորհրդի անդամների կողմից հասարակության տարբեր շերտերի հետ անցկացված բազմաթիվ հանդիպումների, քննարկումների ժամանակ պարզվեց, որ ժողովրդի ճնշող մեծամասնությունը ոչ միայն մտահոգ է, այլև իր ակտիվ մասնակցությամբ պատրաստակամ է ձևավորել ԱԶԳԱՅԻՆ ՃԱԿԱՏ և ԱՆԶԻՋՈՒՄ ՊԱՅՔԱՐՈՎ տեսանելի ժամանակահատվածում հասնել այնպիսի լայն ու հզոր հասարակական շարժման, որն ի զորու կլինի վերջ դնել արատավոր վարչահրամայական, կլանաօլիգարխային ռեժիմին` գործող իշխանությունների անհապաղ հրաժարականի և արդարության ու ժողովրդավարության վերականգնմանը միտված համակարգի ստեղծման, անկախ պետականության հզորացման և հեղինակության բարձրացման պահանջով: Այս մասին ասված է Միավորման` այսօր ընդունած Հռչակագրում:

Ըստ Հռչակագրի`

«ա) Ազգային Ճակատը կարևորելու է արդարացի ժողովրդավարական ընտրությունների միջոցով հասարակության վստահությունը վայելող լեգիտիմ իշխանության ձևավորումը:

բ)    Մենք անհրաժեշտ ենք համարում ժողովրդի պահանջով այսուհետ կիրառել բոլոր միջոցները` «մեծ բիզնեսի» մուտքը իշխանություն իսպառ բացառելու և իշխանական կառույցների ու կապիտալի սերտաճումը չեզոքացնելու համար, ուստի առաջարկելու ենք ընտրություններն անցկացնել միայն համամասնական ընտրակարգով:

գ) Մեր համոզմամբ` երկրում տնտեսական կայունությունն ամրակայելու համար անհրաժեշտ է առավելագույնս խորացնել և ընդլայնել ՌԴ հետ ռազմավարական և բոլոր բնագավառներում սերտ հարաբերությունների խորացումն ու ամրապնդումը` անհրաժեշտ մակարդակի բերելով հարաբերությունները ԱՊՀ այլ երկրների հետ, իսկ մնացած պետությունների հետ հաստատել փոխգործակցություն այնքանով, որքանով կբխի Հայաստանի գերակա շահերից:

դ) Ղարաբաղյան հիմնահարցի արդարացի լուծման մեջ Ազգային Ճակատը մեր հասարակության համար ընդունելի կհամարի միայն պատերազմի արդյունքներին համապատասխանող խաղաղության պայմանագրի կնքումը:

ե) Տասնամյակների ընթացքում Հանրապետությունում ձևավորված ծանր բարոյահոգեբանական մթնոլորտը շտկելու համար անհրաժեշտ ենք համարում համամարդկային և հատկապես ազգային արժեքների ու հայեցի կենսակերպին բնորոշ ավանդույթների լայն քարոզչությունը և վերականգնումը հասարակական կյանքի բոլոր հարթություններում»:

Հռչակագիրը ստորագրել են խորհրդի անդամներ`

ՏԻԳՐԱՆ ԿԱՐԱՊԵՏՅԱՆ /Ժողովրդական կուսակցության նախագահ/

ՎԱՐԴԱՆ ԽԱՉԱՏՐՅԱՍՆ /ԱԺ պատգամավոր/

ԻՇԽԱՆ ԹՈՎՄԱՍԱՅԱՆ /ԺՀԱՔ հ/խ-ի նախագահ/

ԱՐՏԱԿ ՀԱՐՈՒԹՅՈՒՆՅԱՆ /ԺԿ քաղխորհրդի նախագահ/

ԷՄԱՆՈՒԵԼ ՄԱՐԳԱՐՅԱՆ /բանասիրական գիտությունների թեկնածու/

ՌՈՒԶԱՆՆԱ ՍՏԵՓԱՆՅԱՆ /միավորման ակտիվիստ/

ՍՏԵՓԱՆ ԲԱՐԽՈՒԴԱՐՅԱՆ /միավորման ակտվիստ/