Home / Հայաստան / Ընտրություններ Արտաշատում. քաղաքապետի թեկնածուն բարձրաձայնում է լցոնումների մասին

Ընտրություններ Արտաշատում. քաղաքապետի թեկնածուն բարձրաձայնում է լցոնումների մասին

Հուլիսի 3-ին Արտաշատ քաղաքում անցկացվեցին քաղաքապետի ընտրություններ: Քաղաքապետի թեկնածուները երկուսն էին. մեկը գործող քաղաքապետ ՀՀԿ-ական Գագիկ Մուրադյանն էր, մյուսը` անկուսակցական Քաջո Գրիգորյանը:

Նշենք, որ ընտրությունների արդյունքները մինչ հուլիսի 4-ը, ժամը 16:00-ն դեռևս չէին հրապարակվել ԿԸՀ-ի պաշտոնական կայքում:

Արտաշատում տեղակայված  է 11 ընտրատեղամաս, իսկ ընտրողների թիվը  մոտավորապես 23 000 է:

Այս թիվը դժգոհության առիթ է դարձել թեկնածուներից Քաջո Գրիգորյանի համար, ով Epress.am-ի հետ զրույցում նշել է, որ այդ մարդկանց մի մասը Արտաշատում հաստատապես չի բնակվում: Գրիգորյանի խոսքով` ՏԻՄ ընտրություններին բնակիչները ավելի պասիվ են մասնակցում, քան համապետական ընտրություններին:

«Առավել ևս Արտաշատում են պասիվ, քանի որ Արտաշատի գրեթե 25-30 տոկոսը սեփականացված է: Ես նկատի ունեմ մարդկանց` իրենց ընտանիքներով: Սեփականատիրոջը բոլորն էլ ճանաչում են: Մարդիկ իրենց ընտանիքներով իրա համար ծառայում են, ծառայություն են մատուցում: Ընդ որում, մեկը` վախի մթնոլորտով, մեկը` շահով, տարբեր պատճառներ գոյություն ունեն: Բոլորն էլ գիտեն, թե ով ա էստեղի պապան:  Շնորհակալ եմ էդ մարդուն: Ինչո՞ւ, որովհետև  այդ մարդու միջոցով մենք կարողանում ենք տարբերել արդարը և անարդարը, գող-ավազակը,  խուժանը ու խելոքը, հանգիստ մարդը»,- ասել է Գրիգորյանը:

Քաղաքապետի թեկնածուն անդրադարձել է նաև խախտումներին, որոնք, նրա խոսքով, սկսվել են դեռ շաբաթ օրվանից: Նա նշել է, որ Ընտրատարածքային ընտրական հանձնաժողովի (ԸԸՀ) հետ  իրենք համաձայնեցրել են, որ, հաշվի առնելով շոգ եղանակը և ելնելով մարդկային սկզբունքներից, հանձնաժողովների աշխատանքն ավարտել երեկոյան ժամը ութին, մինչդեռ համաձայն օրենքի այդ աշխատանքները պետք է ավարտեն կեսգիշերին: Ու թեև Գրիգորյանը համաձայնվել է, սակայն, կասկածներ ունենալով, նա իր վստահված անձանց հետ ցանկություն է հայտնում մասնակցել այդ աշխատանքներին և շրջելով տեղամասերում, հայտնաբերում է, որ ժամը 15.00-ից արդեն որոշ տեղամասեր  կողպված են: Մի տեղամասում էլ, երբ թեկնածուն ցանկացել է ծանոթանալ արձանագրություններին, հանձնաժողովի նախագահն ասել է, որ ինքը վաղուց ավարտել է իր աշխատանքը, և չի կարող ոչ մի արձանագրության հետ ծանոթացնել թեկնածուին:

«Ես ահազանգել եմ Ընտրատարածքային ընտրական հանձնաժողով,  արձանագրություն եմ կազմել, տանում եմ, որ ներկայացնեմ ԸԸՀ-ը: 16.23-ին ԸԸՀ-ի դուռը կողպած, փակ, ոչ մի անդամ չկա, գոյություն չունի, էդպես էլ ես չկարողացա բողոքս ներկայացնել իրենց», – նշել է Գրիգորյանը:

Նրա խոսքով` ընտրությունների օրը խախտումները սկսվել են հենց առավոտվանից:

Ճնշումներ են գործադրել բոլոր վստահված անձանց վրա, մասնավորապես, սկսել են սպառնալ նրանց` ասելով, որ իրենց ծնողներին աշխատանքից կազատեն:

Գրիգորյանը տեղեկացրել է նաև, որ 15-20 հոգանոց մի խումբ գործող քաղաքապետի որդու հետ շրջում են տարբեր տեղամասերով և ընտրում են յուրաքանչյուր տեղամասում:

Գրիգորյանը ներկայացրել է նաև մեկ ուշագրավ միջադեպ ևս. երբ նա ցանկացել է  մտնել տեղամաս քվեարկության, նրան փորձել են դուրս հանել և միայն մեծ քաշքշուկից հետո քաղաքապետի թեկնածուն վերջապես կարողացել է  կատարել իր քաղաքացիական պարտքը:

Ավելի ուշ Քաջո Գրիգորյանը տեղեկացրել է, որ բացառությամբ երկու տեղամասի, մնացած բոլոր տեղամասերում 7-8 անգամ լցոնում են իրականացրել: Իր վստահված անձինք ձայների հաշվարկից հետո հրաժարվել են արդյունքների տակ ստորագրել: