Էդվարդ Նալբանդյանը ԵԱՀԿ նորընտիր քարտուղարին հրավիրել է Հայաստան

Հուլիսի 15-ին Վիեննայում Էդվարդ Նալբանդյանը հանդիպում ունեցավ ԵԱՀԿ նորընտիր գլխավոր քարտուղար Լամբերտո Ձանիերի հետ:

ՀՀ ԱԳՆ հաղորդագրության համաձայն, հանդիպման ընթացքում Էդվարդ Նալբանդյանը հույս է հայտնել, որ Լամբերտո Ձանիերը իր կարևոր ներդրումը կունենա համաեվրոպական կազմակերպության նպատակների իրագործման գործում:

Զրուցակիցները քննարկել են ԵԱՀԿ գործունեության տարբեր ոլորտներին առնչվող հարցեր, մտքեր փոխանակել կազմակերպության բարեփոխումների շուրջ:

ԵԱՀԿ գլխավոր քարտուղարի խնդրանքով Հայաստանի ԱԳ նախարարը ներկայացրել է արցախյան հիմնախնդրի կարգավորման բանակցային գործընթացի վերջին զարգացումները՝ ընդգծելով ԵԱՀԿ Մինսկի խմբի կարևոր դերակատարումն ու ջանքերը հակամարտության լուծման գործընթացում:

Մեկնարկած երկխոսությունը շարունակելու նպատակով Էդվարդ Նալբանդյանը Լամբերտո Ձանիերին հրավիրել է այցելել Հայաստան: