Հայաստանն աշխարհում ուժեղագույն շախմատային թիմն է

Հայաստանի շախմատի հավաքականը նվաճեց չեմպիոնի կոչումը Չինաստանի Նինբո քաղաքում ընթացող աշխարհի թիմային առաջնությունում:

Այսօր հայաստանցիները հանդիպել էին Ուկրաինայի ընտրանու հետ: Չեմպիոնության համար մեր թիմին ընդամենը ոչ-ոքի էր հարկավոր:

Ուկրաինան կարող էր հավակնել հաղթանակի միայն խոշոր հաշվի դեպքում, սակայն միակ պարտիան, որտեղ ուկրաինացիներն առավելություն ստացան` առաջին տախտակին էր ընթանում Վասիլի Իվանչուկի և Լևոն Արոնյանի միջև:

Երկրորդ տախտակին` Սերգեյ Մովսեսյան-Պավել Էլյանով պարտիայում հավասար պայքար էր ընթանում, իսկ Գաբրիել Սարգսյան-Ալեքսանդր Մոիսեենկո և Վլադիմիր Հակոբյան Զահար Եֆիմենկո զույգերում հայաստանցի շախմատիստները առավելություն էին ստացել:

Գնահատելով ստեղծված իրավիճակը` շախմատիստները իրար հետևից ոչ-ոքիներ պայմանավորվեցին` 2:2, որը Հայաստանի ընտրանուն անհասանելի դարձրեց մինչ տուրի մյուս հանդիպումների ավարտը:

Ուկրաինացիները հնարավորություն ստացան արծաթե մեդալներ նվաճել: Դա տեղի կունենա այն դեպքում, եթե Չինաստանը չհաղթի Հունգարիան: Այս պահին այդ հանդիպումը դեռևս շարունակվում է:

Վերջին տուրի արդյունքները և մրցաշարային աղյուսակը կներկայացնենք բոլոր պարտիաների ավարտից հետո: