Ավտոմեքենան մխրճվել է երևանյան գիշերային ակումբի մուտքի մեջ

Նոյեմբերի 2-ին, ժամը 01.00-ի սահմաններում Երևան քաղաքի Արցախի պո­ղոտայի թիվ 1 շենքին բախվել է ավտոմեքենա. ներսում առաջացել է ծխապատ գոտի, հաղորդում է ՀՀ ԱԻՆ փրկարար ծառայությունը:

Դեպքի վայր են մեկնել երկու մարտական հաշվարկ և փրկարարական ուժերի վարչության օպերատիվ խումբը:

Տեղում պարզվել է, որ «Ֆոլցվագեն պասսատ» մակնիշի ավտոմեքենան մխրճվել է «Թայմ Սքվեր» գիշերային ակումբի մուտքի մեջ: Տեղի ուժերով ավտոմեքենայից դուրս է բերվել վարորդ, 1990 թվականին ծնված Հովիկ Կնյազյանը, հրշեջ-փրկարարների ուժերով` ուղևոր, 1965 թվականին ծնված Լյուդվիգ Կնյազյանը:

Տուժածները տարբեր աստիճանի մարմնական վնասվածքներով տեղափոխվել են «Էրեբունի» բժշկական կենտրոն. նրանց առողջական վիճակը գնահատվել է միջին ծանրության: