Լոռու մարզում 300 հեկտար անտառ է այրվել

Երեկ ժամը 19:00-ի սահմաններում Լոռու մարզի Տաշիր քաղաքի գերեզմանատան մոտակայքում խոշոր հրդեհ է բռնկվել, սկսել են այրվել խոտածածկ տարածքները:

Դեպքի վայր մեկնած փրկարարները Տաշիրի հարակից տարածքում` Սարատովկա, Նովոսելցովո, Մեդովկա, Կրուգլայա շիշկա, Լեռնահովիտ, Պետրովկա գյուղերի մոտ, հայտնաբերել են ևս 10-ից 14 հրդեհի օջախ, հաղորդում է ՀՀ ԱԻՆ փրկարար ծառայությունը: Հրդեհը տարածվել է նաև անտառային տարածքներում:

Հրդեհի օջախներին մոտենալու համար պահանջվել են բարձր անցողության տրանսպորտային միջոցներ և լրացուցիչ ուժեր: Դեպքի վայր են մեկնել  զինծառայողներ` բեռնատար ավտոմեքենաներով: Հրդեհաշիջման աշխատանքներին մասնակցել են նաև «Հայանտառ» ՊՈԱԿ-ի և Տաշիրի քաղաքապետարանի  աշխատակիցները, ինչպես նաև վերոնշված գյուղերի բնակչությունը:

Հրդեհի օջախները մարվել են ժամը 02.30-ին: Այրվել է 1700 հա խոտածածք և 300 հա անտառածածկ տարածք: