Home / Հայաստան / Երևանում բացահայտել են Վրաստանի քաղաքացու կատարած գողությունը

Երևանում բացահայտել են Վրաստանի քաղաքացու կատարած գողությունը

Հունվարի 13-ին, ժամը 20.05-ին, ոստիկանության քրեական հետախուզության գլխավոր վարչության ծառայողներն օպերատիվ միջոցառումներ իրականացնելիս, կողոպուտներ կատարելու կասկածանքով, Ավան համայնքում գտնվող «Գրանդ Քենդի» խանութի մոտից բերման էին ենթարկել Վրաստանի 32-ամյա քաղաքացի Միխայիլ Մուրադաշվիլուն:

Նա խոստովանել էր, որ կողոպուտներ է կատարել Երևան քաղաքի Կենտրոն համայնքի տարածքում:

Ոստիկանության Կենտրոնականի բաժնի ծառայողների ձեռնարկված միջոցառումների շնորհիվ հունվարի 15-ին պարզվել է, որ Մուրադաշվիլին 2011 թ. դեկտեմբերի 25-ին, ժամը 18.30-ի սահմաններում, Երևանի Տիգրան Մեծի պողոտայի թիվ 6 շենքի մոտ բացահայտ հափշտակել է 21-ամյա մի աղջկա դրամապանակը, որի մեջ եղել է 75.000 դրամ և  բջջային հեռախոս:

Տուժողը ոստիկանություն չէր դիմել: Ոստիկանությունը միջոցառումներ է ձեռնարկվում Մուրադաշվիլու գործողություններից տուժած մյուս քաղաքացիներին հայտնաբերելու ուղղությամբ: