Մասիսում եղբորը սպանած երիտասարդը հոգեկան շեղումներ չունի, ցույց է տվել հետազոտությունը

Դեկտեմբերի 23-ին Մասիսի ոստիկանության կողմից ձերբակալված 27-ամյա Արմեն Քալաշյանը, ով դանակով հարվածել և սպանել էր կրտսեր եղբորը՝  Էրիկ Քալաշյանին, գտնվում է կալանքի տակ: Քալաշյանն  անցել է մի շարք հետազոտություններ, որոնց արդյունքում պարզվել է, որ տղան հոգեկան շեղումներ չունի և բացարձակ առողջ է: Այս մասին Epress.am-ի հետ զրույցում ասել է ՀՀ ոստիկանության լրատվական ծառայության աշխատակից Սևակ Միլիտոնյանը:

«Արմեն Քալաշյանի գործով դատավարությունը դեռևս չի կայացել: Կատարվում է նախաքննություն»,- ասել է  Միլիտոնյանը:

Հիշեցնենք, որ ամեն ինչ սկսվել է երեկոյան ընթրիքի ընթացքում ծագած վիճաբանությունից: Եղբայրները  ընթրելուց ոգելից խմիչք են օգտագործել, և կենցաղային հողի վրա բորբոքված կրքերը  վերածվել են ծեծկռտուքի: Մայրը մի քանի անգամ փորձել է բաժանել տղաներին, սակայն երբ գնացել է խոհանոց, Արմենը վերցրել է վառարանի մոտ դրված դանակը, հարվածել  եղբոր կրծքավանդակին ու տնից դուրս փախել՝ իր հետ տանելով նաև դանակը, որը փորձել էր դրսում թաքցնել: Հայտնաբերելով  տղայի արնաթաթախ մարմինը` մայրը շտապօգնություն է կանչել, սակայն նրա կյանքը փրկել չի հաջողվել:

Ըստ Միլիտոնյանի` Արմեն Քալաշյանը  հանցանքի պահին եղել է խմիչքի ազդեցության տակ:

«Մարդկային այս տեսակի համար որևէ  արդարացում չկա, նա կպատժվի օրենքի ողջ խստությամբ», – ավել վաղ Epress.am-ի հետ զրույցում ասել էր Սևակ Միլիտոնյանը: