Epress.am Լուրեր Հայաստանից
Ռուսաստանի քաղաքացի «Ռենովա» ընկերության տնօրեն Գեորգի Իոսիֆյանը պնդում է, որ «Jose» ռեստորանային համալիրի սեփականատեր, Արարատյան Հայրապետական թեմի առաջնորդ Նավասարդ Կճոյանի սանիկ Մհեր Ավետիսյանը իրեն 12 միլիոն դոլարի «քցել է», գրում է «Չորրորդ ինքնիշխանություն» օրաթերթը` մանրամասներ ներկայացնելով: Թերթի հաղորդմամբ, դեպքի մասին Իոսիֆյանը տեղեկացրել է ՀՀ նախագահ Սերժ Սարգսյանին:
«ՉԻ»-ին ուղղված նամակում Իոսիֆյանը նշում է անուններ՝ ՀՀ վարչապետ Տիգրան Սարգսյան, Մհեր Ավետիսյան և Նավասարդ Կճոյան։ «ՉԻ»-ն նշում է, որ, Իոսիֆյանի պնդմամբ, հենց Մհեր Ավետիսյանն է մշակել իրեն թալանելու ողջ սխեման, նա գործում է Կճոյանի, իսկ վերջինս էլ` Տիգրան Սարգսյանի հովանու ներքո:
Իոսիֆյանի նամակում նշվում է, որ Մհեր Ավետիսյանը 2007 թվականից դառնում է ղազախական ԲՏԱ բանկի հաճախորդը։ Վերջինս մտերմանում է բանկի հայաստանյան մասնաճյուղի ղեկավարի հետ, անգամ դառնում է նրա մուսուլման երեխայի քավորը։ Այնուհետև նրան մի քանի միլիոն ԱՄՆ դոլարի վարկ են տրամադրում։ Այս բանկից այդ ընթացքում վարկ են վերցրած լինում նաև, օրինակ, ՀՀ պաշտպանության փոխնախարար Արշալույս Փայտյանը` իր ընտանիքին պատկանող «Փայտ Գրիգ» ընկերության համար:
Ընդհանուր առմամբ, բանկը տարբեր մարդկանց շուրջ 16 միլիոն ԱՄՆ դոլարի վարկ է տրամադրած լինում։
Իոսիֆյանը գրում է, որ 2009 թվականին Մհեր Ավետիսյանը մտերմանում է ԲՏԱ բանկի հայաստանյան մասնաճյուղի ղեկավարի հետ։ Բանկը շուրջ 16 միլիոն ԱՄՆ ղոլար է ունենում անբարեխիղճ վարկառուների մոտ, նրանք ամիսներով տոկոս չեն մուծում, դրանց գումարվում են նաև տույժ-տուգանքները։ Արդյունքում՝ գործը հասնում է բանկային գործունեության նորմատիվների խախտման վտանգին, և որպեսգի բանկը «չպայթի», Գեորգի Իոսիֆյանի միջնորդությամբ բացվում է «Սարկապիտալ» ընկերությունը, և 12 միլիոն ԱՄՆ դոլար է ներդնում ընկերության մեջ։
«Սարկապիտալը» 16 միլիոն պարտքի դիմաց բանկին վճարում է այդ 12 միլիոնը, և այդ վարկերը տեղափոխում է իր բալանսին։
Բանկ մտնում է այդ 12 միլիոն դոլար, 4 միլիոն կորուստը տեղավորվում է բանկի նորմատիվների մեջ, իսկ 16 միլիոն դոլարի պարտքը՝ 29 միլիոն ԱՄՆ դոլար գրավով տեղափոխվում է «Սարկապիտալի» բալանսի վրա:
Իոսիֆյանը մտածում է, որ կկարողանա իր 12 միլիոնը հավաքագրել անբարեխիղճ «վարկառուներից», որոնք մեծահարուստներ են, իսկ եթե դա չհաջողվի, ապա կդիմի դատարան և գրավադրված գույքի վաճառքից հետ կստանա իր գումարները:
Իոսիֆյանը նշում է, որ «Սարկապիտալ»-ի հիմնադրման ընթացքում ղազախ Մարատ Եվտաելևին լիազորագիր են տալիս, որպեսզի նա նշանակի ընկերության տնօրեն։
Ղազախն, իր հերթին, տնօրեն է նշանակում ԲՏԱ բանկի վարկային մասնագետին։ 2009 թվականի հունվար, փետրվար, մարտ և ապրիլ ամիսներին վերջինս նորմալ աշխատում է, զանգահարում է վարկ ունեցող կոնկրետ անձանց, նրանց հետ խոսում է, փորձում է որոշակի գումարներ հավաքագրել։
«Շուտով, սակայն, «Սարկապիտալը» «աշխատացնողներն» իրենց բանկային հաշիվները հանում են ԲՏԱ բանկից և այլևս դառնում են «Արդշինինվեստ» բանկի հաճախորդը։ Սա առաջին ահազանգն է լինում, շատ շուտ հասկանալի է դառնում, որ խաբեբաների «թայֆան» որոշել է հաղթահարել բանկի վերահսկողությունը, ուստի հաշիվները հանել է այնտեղից։ Այս մասին ահազանգ է ստանում նաև Գեորգի Իոսիֆյանը, որն էլ 2009 թվականի հունիսին գալիս է Հայաստան և այցելում «Սարկապիտալ»-ի օֆիս», – գրում է «ՉԻ»-ն:
Իոսիֆյանի խոսքով` օֆիսը փոքր կոշիկի խանութում էր:
«Իմացա, որ 4 ամսվա ընթացքում այդ տնօրենը 78 հազար ԱՄՆ դոլար է հավաքել վարկառուներից, համենայնդեպս՝ այդքան տոկոս, տույժ-տուգանք մուտք էր եղել։ Բայց ոնց մտել էր, այդպես է դուրս է եկել, որովհետև մարդիկ ծախս էին ցույց տվել։ Բայց մինչև իմ Հայաստան գալը՝ մայիսի 8-ին, վարկային մասնագետին, ով տնօրեն էր նշանակված, գործից ազատում են։
Հետո պարզ դարձավ, որ նա ևս մախինացիայի մեջ է եղել, Մհեր Ավետիսյանը հենց նրա հետ է սկսել աշխատել։ Նրա անունն Արմեն Սարգսյան է, ով հիմա էլ աշխատում է ԲՏԱ բանկում։ «Սարկապիտալի» տնօրեն են նշանակում ոմն Լևոն Խաչատրյանի։ Վերջինս հիմա անազատության մեջ է։ Նստած է բանտում», – գրել է Գեորգի Իոսիֆյանը։
Լևոն Խաչատրյանը հայտնվել է ԱԱԾ մեկուսարանում այն բանից հետո, երբ սկսել է բացվել այս պատմության կծիկը։
«Ես ամենայն պատասխանատվությամբ հայտարարում եմ, որ Մհեր Ավետիսյանն է հրավիրել Լևոն Խաչատրյանին «Սարկապիտալ» և նրան անօրինական ճանապարհով դարձրել տնօրեն՝ իր խաբեբայությունն իրականացնելու համար։ Իմ ներկայացուցիչը, մինչև իմ Հայաստան գալն ու դատախազության դիմելը, հանդիպել է ընկերությունից ազատված տնօրեն Արմեն Սարգսյանի հետ, նրան հարցրել է, թե ուր է ընկերության կնիքը, ինչ է կատարվում «Սարկապիտալում». նա պատասխանել է, թե` ես խաբար չեմ, Մհերին հարցրեք։ Ղազախ ներկայացուցիչը բացարձակ կապ չունի, որովհետև ղազախի լիագորագիրը՝ տրված մեր կողմից, վերջացել է ապրիլի 16-ին», – նամակում գրել է Գեորգի Իոսիֆյանը։
Լուսանկարը` gov.am