Epress.am Լուրեր Հայաստանից
Այսօր առավոտյան Գեղարքունիքի մարզի Մարտունի քաղաքի Կամոյի փողոցի հացի գործարանին կից պահակատանը տեղի ունեցած գազի պայթունից տուժած Խաչատրյանների ընտանիքի չորս անդամներն այժմ գտնվում են Մարտունի քաղաքի հիվանդանոցի վերակենդանացման բաժանմունքում: Այս մասին Epress.am-ի հետ զրույցում պատմել է «Մարտունի» բժշկական կենտրոնի տնօրեն Եղիշե Հարեյանը:
«Այս պահին վիրահատվում է ընտանիքի հայրը՝ 47-ամյա Վանիկը, ում մոտ հայտնաբերվել էր ոտքի բազմաբեկորային բաց կոտրվածք, իսկ 44-ամյա մոր՝ Սոնայի, աղջկա՝ 21-ամյա Նուշիկի վիճակն այս պահի դրությամբ գնահատվում է կայուն ծանր: Տղայի՝ 26-ամյա Նարեկի վիճակը բնութագրվում է միջին ծանրության:
Մայրը, աղջիկն ու տղան ստացել են 2-րդ և 3-րդ կարգի այրվածքներ», – տեղեկացրել է Հարեյանը:
Տնօրենի խոսքով՝ մինչ այժմ տուժածների մոտ վիճակի վատացում չի եղել, հետևաբար բուժումը շարունակվելու է իրենց կենտրոնում:
«Առավոտյան պարզ կդառնա, տուժածները կտեղափոխվեն Երևան, թե՝ ոչ: Ամեն ինչ կախված է ինքնազգացողությունների հետագա զարգացումից: Մենք անում ենք հնարավոր ամեն ինչ բարդություններից խուսափելու համար և քանի դեռ ամեն ինչ կայուն է, տուժածները կմնան մեր կենտրոնում: Հարազատները նույնպես չեն շտապում նրանց Երևան տեղափոխել», – նշել է Հարեյանը: