Ընտրություններին ընդառաջ ՀՀԿ-ի, ԲՀԿ-ի և ՕԵԿ-ի հանդիպումները կհաճախակիանան. Շարմազանով

Երկուշաբթի երեկոյան նախագահական նստավայրում կայացել է Հայաստանի իշխող կոալիցիայի երեք կուսակցությունների ղեկավարների՝ երկրի նախագահ, Հայաստանի հանրապետական կուսակցության (ՀՀԿ) առաջնորդ Սերժ Սարգսյանի, «Բարգավաճ Հայաստան» կուսակցության (ԲՀԿ) նախագահ Գագիկ Ծառուկյանի և «Օրինաց երկիր» կուսակցության (ՕԵԿ) նախագահ Արթուր Բաղդասարյանի հանդիպումը։

Հանրապետականի մամուլի խոսնակ, Ազգային ժողովի փոխնախագահ Էդուարդ Շարմազանովը «Ազատություն» ռադիոկայանի հետ զրույցում կարծիք հայտնեց, թե կոալիցիայի ղեկավարների հանդիպումները սովորական երևույթ է Հայաստանի ներքաղաքական կյանքում, և որքան մոտենան խորհրդարանական ընտրությունները, այնքան հաճախակի կդառնան այդ հանդիպումները։

Ինչ վերաբերում է ներկոալիցիոն խմորումների, մասնավորապես՝ Հանրապետական – «Բարգավաճ Հայաստան» հակասությունների և դրանց արդյունքում ԲՀԿ-ի՝ կոալիցիայից դուրս գալու մասին շրջանառվող լուրերին, Շարմազանովն ասել է. «Եթե համոզմունք եմ հայտնում, թե կոալիցիայի երեք ուժերի ղեկավարները շարունակելու են հանդիպել, դրանով պատասխանում եմ նաև Ձեր հարցին»։

Լուրեր են շրջանառվում, թե առաջիկայում՝ կոալիցիոն հավաքներց մեկի ժամանակ, ստորագրվելու է նոր հուշագիր. այդ տեղեկությունները ՀՀԿ-ի խոսնակը չցանկացավ մեկնաբանել։