Հաղորդավարին շնորհակալություն են հայտնում «Պուտինի թաղման» համար. նրան չեն պատժի (ՏԵՍԱՆՅՈՒԹ)

Ռուսաստանի Կրասնոյարսկ քաղաքի ТВК հեռուստաալիքի լրագրող Մարիա Բուխտուևան չի պատժվի եթերում հնչեցրած սխալ բառի համար:  Հիշեցնենք, որ հունվարի 27-ին ուղիղ եթերում Բուխտուևան Վլադիմիր Լենինի աճյունը դամբարանից տեղափոխելու և թաղելու վերաբերյալ ծրագրում սխալմամբ Լենին բառի փոխարեն արտաբերել էր վարչապետ Վլադիմիր Պուտինի ազգանունը: «Պե՞տք է արդյոք թաղել Վլադիմիր Պուտինին: Այս թեման ներկայումս ակտիվ քննարկում են համացանցում»,- ասել է հաղորդավարը, ով ТВК-ում զբաղեցնում է նաև լուրերի բաժնի գլխավոր խմբագրի պաշտոնը:

«Մարիայի հետ ամեն ինչ կարգին է, նա աշխատում է, և որևէ պատժամիջոց նրան չի սպառնում: Պետք է հասկանալ, որ մենք աշխատում ենք կենդանի ռեժիմով, առանց հուշողի»,- «ՌԻԱ Նովոստի»-ին հայտնել է ТВК-ի լուրերի բաժնի տնօրեն Վիկտորիա Կոմարովան:

Այս թեման, ի դեպ, համացանցում մեծ աշխուժություն է առաջացրել: “Вконтакте” սոցիալական ցանցում  հենց լրագրողի անձնական էջում գրեթե ամեն վայրկյան հաղորդագրություններ են հայտնվում տարբեր օգտատերերից, հիմնականում շնորհակալական խոսքերով: Օգտատերերից մեկը գրում է, որ Մարիա Մուխտուևան առաջինը արտաբերեց այն, ինչ «կար միլիոնավոր մարդկանց մտքում»:

Օգտատերերը նաև վիրտուալ նվերներ են ուղարկում լրագրողին, ինչպես, օրինակ, «Օսկար»  մրցանակաբաշխության արձանիկ: