Հայաստանում կրծքի քաղցկեղի երիտասարդացման միտում կա

Մինչև 35 տարեկան կանայք պետք է տարին մեկ անգամ կրծքագեղձի համար սոնոգրաֆիայի զննության ենթարկվեն, իսկ 35-ից բարձր կանայք տարեկան պետք է երկու անգամ զննություն անցնեն` սոնոգրաֆիա և մամոգրաֆիա: Նման խորհրդով այսօր լրագրողների հետ հանդիպմանը հանդես են եկել Հայ-ամերիկյան առողջության կենտրոնի գործադիր տնօրեն Խաչանուշ Հակոբյանը և կենտրոնի ռադիոլոգիայի բաժնի վարիչ Անի Հակոբյանը:

Վերջիններս, ներկայացնելով 2011 թ. արձանագրված կրծքագեղձի քաղցկեղի ցուցանիշները, փաստել են, որ այն երիտասարդացման միտումներ ունի:

«Մոտ 1700 կին է մեզ այցելել, երբեմն ուղղակի այնպիսի վիճակ է եղել, որ նույնիսկ մամոգրաֆիա անելը անհնար է եղել: Ցավոք, մենք ունենք երիտասարդացման միտում, և հենց երեկ էր, որ մեր բժիշկները ախտորոշեցին ևս մեկ 31 ամյա աղջկա, ով պատրաստվում էր ամուսնանալ և ընդհանարպես պետք է որ նման բանի մասին չմտածեր, սակայն կասկած կա, որ այդ աղջիկը հիվանդ է կրծքի քաղցկեղով», – ասել է Խաչանուշ Հակոբյանը:

Նրա խոսքով` ըստ կենտրոնի վիճակագրության` 30-39 տարեկան մոտ 500 կին  հիվանդ է կրծքի քաղցկեղով, մինչև 29 տարեկան` 60 կին: Մինչև օրս կենտրոնում հետազոտվել է 520 տղամարդ, որոնցից մեծ մասը ունի կրծքի բարորակ ախտահարում, իսկ 22-ի մոտ արձանագրվել է քաղցկեղ:

Ինչ վերաբերում է կրծքի քաղցկեղի գենետիկ փոխանցմանը, Անի Հակոբյանը նշել է, որ բոլոր այն կանայք ու աղջիկները, ում ընտանքիներում մայրական գծում կա կրծքագեղձի կամ այլ տիպի քաղցկեղ, պետք է դիմեն բժշկի տարին երկու անգամ:

Բանախոսները փաստել են, որ թեև քաղցկեղը դեռևս չի բուժվում, բայց  սկզբնական շրջանում ի հայտ գալու դեպքում հնարավոր է  կանխել դրա հետագա զարգացումը:

Խաչանուշ Հակոբյանը կարևորել է հոգեբանական կողմը. Նրա խոսքով` այն կանայք, ովքեր պայքարում են և լավատես են, աղթահարում են այդ հիվանդությունը:

Բանախոսները նաև խորհուրդ են տվել կանանց հնարավորինս քիչ ենթարկվել սթրեսների և դեպրեսիաների, քանի որ դրանց հետևանքով օրգանիզմի դիմադրողականությունն ընկնում է, և չի բացառվում քաղցկեղի առաջացումը:

Նշենք,  որ Հայ-ամերիկյան առողջության կենտրոնում կրծքագեղձի քաղցկեղի համար հետազոտումն արժե 11 000 դրամ: Զննությունն անվճար է միայն  անչափահասների, բազմազավակ մայրերի և զոհված ազատամարտիկների ընտանիքների կանանց համար: