Ճապոնիայում ձյունը 103 մարդ է սպանել. շատերը տան տանիքներն էին մաքրում

Ճապոնիայում զանգվածային ձյան տեղումների հետևանքով առնվազն 103 մարդ է զոհվել, հայտնում է «ՌԻԱ Նովոստին»:

Զոհերի մեծ մասը` առնվազն 60 մարդ, մահացել է սեփական տան տանիքները մաքրելիս: Հիմնականում նրանք տարեց մարդիկ են`65-ից բարձր: Հաճախ մահվան պատճառ են դառնում տանիքներից և այլ բարձր վայրերից թափվող ձնակույտերը:

Առատ ձյան տեղումներ են գրանցվել երկրի գրեթե ողջ տարածքում: Associated Press-ի փոխանցմամբ` Ճապոնիայի որոշ հատվածներում ձյան շերտը 2-5 անգամ գերազանցել է միջին տարեկան նորման:

Վերջին տարիների ընթացքում սառնամանիքների և ձյան տեղումների հետևանքով առավել մեծ թվով մահեր են գրանցվել 2006 թվականին: Այն ժամանակ Ճապոնիայում 152 մարդ էր զոհվել: