Home / Հայաստան / Բնապահպանները այգում կանգնեցրին քաղաքապետի «արձանը», որը դարձավ «օլիգարխ» (թարմացված)

Բնապահպանները այգում կանգնեցրին քաղաքապետի «արձանը», որը դարձավ «օլիգարխ» (թարմացված)

Մաշտոցի այգում կրպակների կառուցման դեմ պայքարող բնապահպանները, չնայած եղանակին, շարունակում են բողոքի ակցիան: Օրվա ընթացքում նրանց մոտենում էին բազմաթիվ մտահոգ քաղաքացիներ, ինչպես նաև հարակից շենքերի բնակիչները, ովքեր իրենց դժգոհությունն էին հայտնում ոստիկանների գործողությունների վերաբերյալ: Վերջիններս շրջափակել են կրպակները, և հնարավորություն չեն տալիս բնապահպաններին միջամտել շինարարների գործողություններին:

Բնապահպան ակտիվիստները զոդման աշխատանքների ժամանակ վանկարկում էին «Ամոթ զոդողներին», ինչը նյարդայնացնում էր շինարարներին, ովքեր պահանջում էին, որպեսզի իրենց թողնեն «հանգիստ աշխատել»:

Ակտիվիստներն էլ, իրենց հերթին, նշում էին, որ ոստիկանների և շինարարների գործողություններն ապօրինի են:

Երևանում տեղացող ձյան ուժգնացումը չստիպեց բողոքողներին հեռանալ այգուց: Երիտասարդները սկսեցին ձնեմարդ պատրաստել, նրա գլխին աղբաման դրեցին` հայտարարելով, որ դա Երևանի քաղաքապետ Տարոն Մարգարյանի արձանն է: Այնուհետև ակտիվիստները որոշեցին, որ ձնեմարդը խորհրդանշում է օլիգարխին, և համապատասխան գրություն փակցրեցին ձնեմարդի վրա:

Երիտասարդները նաև կիթառ են նվագում և մաքրում տարածքը: