Մարգար Օհանյանը դատավորին խնդրել է հետևել Սերժ Սարգսյանի կոչին

Այսօր ՀՀ Ճանապարհային ոստիկանության նախկին պետ Մարգար Օհանյանի պաշտպան Մկրտիչ Վասակյանը միջնորդել է փոխել իր պաշտպանյալի նկատմամբ խափանման միջոցը: Պաշտպանական կողմը ցանկանում է, որ Օհանյանին, ով մեղադրվում է բենզինի յուրացման մեջ, ազատ արձակեն գրավի դիմաց:

Գործով անցնող մյուս մեղադրյալները և տուժող կողմն այդ միջնորդությանը դեմ չեն եղել:

Միայն դատախազ Հարություն Հարությունյանն է առարկել միջնորդության դեմ` համարելով, որ այն անհիմն է և ենթակա է մերժման:

Միջնորդության վերաբերյալ իր կարծիքն է  հայտնել Մարգար Օհանյանը` հիշեցնելով դատավորին ու դատախազին Սերժ Սարգսյանի 2011 թվականի դեկտեմբերի 22-ի հայտարարությունը:

Օհանյանի խոսքով` այդ հայտարարության մեջ Սերժ Սարգսյանը կոչ է արել  դատավորներին ու դատախազներին լինել արդար: ՃՈ նախկին պետը խնդրել է  նրանց հետևել այդ կոչին և իր նկատմամբ արդարացի որոշում կայացնել:

Օհանյանի պաշտպանի միջնորդության որոշումը դատավոր Մխիթար Պապոյանը կհրապարակի այսօր, ժամը 14:00-ին: