«Ձնեմարդուկ» փառատոն` Ջերմուկում (ՏԵՍԱՆՅՈՒԹ)

Հանգիստն ավելի բովանդակալից դարձնելու նպատակով «Ջերմուկի զարգացման կենտրոնի» ակտիվ երիտասարդների և քաղաքապետարանի ջանքերով մարտի 11-ին Ջերմուկում կազմակերպվեց «Ձնեմարդուկ» փառատոնը:

Կազմակերխիչների փոխանցմամբ` գարնանային  ջերմության  ակնկալիքով ձյանը  հրաժեշտ տալու էին  եկել Վայոց  ձորի մարզի տարբեր  կողմերից: Հագեցած  ծրագրով  փառատոն-մրցույթն իր մեջ ներառում  էր «Լավագույն ձնեմարդ» և «Լավագույն ձնեքանդակ» անվանակարգերը, զվարճալի խաղեր, դահուկավազք և նույնիսկ  ֆուտբոլ:

Ջերմուկի  բոլոր  այցելուների համար ճոպանուղին անվճար էր: Մինչև  կեսօր  արդեն հայտնվեցին  բազմաթիվ  հետաքրքիր քանդակներ, որոց կողքին իր պատվավոր տեղն էր  գտել ձմեռային  հագուստին հրաժեշտ տված գարնանային  հանդերձանքով ձնեմարդուկը: Իսկ արևայրուք ընդունող կիսամերկ ու կարմրաթուշ տատիկի ձնե քանդակը ոչ միայն  բարձրացրեց հյուրերի տրամադրությունը, այլև շահեց 2-րդ մրցանակը: Առաջին պատվավոր տեղը գրավեց ժպտերես հսկա փղիկը: Իսկ քանդակը կերտող թիմը ստացավ մեկօրյա հանգստի հնարավորություն Ջերմուկի լավագույն հյուրանոցներից մեկում: