Ցեղասպանության մասին «Ժառանգության» առաջարկած նախագիծը չընդունվեց

Օսմանյան կայսրությունում պոնտոսահույների, ասորիների և այլ ազգերի ցեղասպանության դատապարտման մասին ԱԺ «Ժառանգություն» խմբակցության ներկայացրած նախագիծն այսօր ԱԺ-ում չընդունվեց, սակայն մինչ որոշման ընդունումը հարցի վերաբերյալ բուռն քննարկում ծավալվեց:

«Ժառանգության» պատգամավոր Ստեփան Սաֆարյանն իր զարմանքն է արտահայտել, թե ինչպես կարող է մի երկիր, որը ցեղասպանություն է վերապրել և ցեղասպանության ընդունում է հայցում աշխարհից, այլ ազգերի նկատմամբ կատարված ցեղասպանություններին դեմ քվեարկի:

ԱԺ նախագահ Սամվել Նիկոյանն էլ կարծիք է հայտնել, որ աշխարհի հզոր պետություններն առաջին հերթին ազգային պետական շահն են հաշվի առնում: Ի պատասխան` «Ժառանգության» մեկ այլ պատգամավոր Արմեն Մարտիրոսյանն ասել է, որ աշխարհի հզոր պետությունները ցեղասպանության չեն ենթարկվել և որ Նիկոյանի պատասխանն արդարացված չէ:

ՀՀԿ խմբակցության ղեկավար Գալուստ Սահակյանն էլ, նախ` նշելով, որ իրենք «ոչ թե հայցում են ցեղասպանության ընդունում, այլ պահանջում են», գործընկերներին  առաջարկել է նախագծի ընդունումը հետաձգել, հետո էլ հավելել է, որ իրենք այս նախագծի քվեարկությանն ուղղակի չեն մասնակցելու:

«Ժառանգության» պատգամավոր Զարուհի Փոստանջյանը` ի պատասխան Սահակյանի հայտարարության, հայտարարել է, որ եթե անգամ իրենք չմասնակցեն քվեարկությանը, իր մոտ այնպիսի տպավորություն է, որ այս ԱԺ-ում «ՀՀԿ-ի վրա թուրքական  կառավարության ներգործությունն է ազդել և այսօր թուրքական կառավարության  ներգործության ներքո ՀՀ ԱԺ-ն չի ցանկանում այս նախագծի վերաբերյալ իր դիրքորոշումը հայտնել»:

«Միանշանակ է, որ դիրքորոշումը պետք է լինի դրական: Շատ ցավալի է, որ այսօր այս ԱԺ-ում շարունակվում է  Օսմանյան կայսրության իրավահաջորդ Թուրքիայի հանրապետության քաղաքականությունը, որի հետևանքով այս խորհրդարանում են գտնվում հայ-թուրքական խայտառակ արձանագրությունները և դեռ ավելին` այս օրինագծի վերաբերյալ, որը դատապարտում է Օսմանյան կայսրութունում տեղի ունեցած այլ ազգերի`  հույների, ասորիների, եզդիների  ցեղասպանության  դատապարտման վերաբերյալ: Այս օրինագծին դուք  հանձաժողովի նիստում դեմ քվեարկեցիք, իսկ այսօր էլ փորձում եք տապալել»,- ասել է Փոստանջյանը:

ԱԺ փոխխոսնակ  Էդուարդ Շարմազանովը կարծիք է հայտնել, որ իր գործընկերների ելույթներն ավելի շատ ձև են հիշեցնում, այլ ոչ  բովանդակություն: Այնուհետև  պատմական անդրադարձ է կատարել.

«Օսմանյան կայսրությունում 15-20 թվականներին տեղի է ունեցել քրիստոնյա ազգաբնակչության ցեղասպանություն: Եվ այդ ցեղասպանությունը ամբողջ աշխարհը ընդունում է որպես  մեկ ամբողջություն, այսինքն` Հայոց ցեղասպանություն: Ավելին` ՀՀ-ն Սահմանադրական նորմով, իր անկախության հռչակագրով  և Սահմանադրության մեջ ընդունել է Հայոց ցեղասպանությունը:

Անցյալ տարի ՀՀԿ-ն` ՀՅԴ խմբակցության ղեկավար  Վահան Հովհաննիսյանի և մեր կոլալիցիոն այլ գործընկերների ջանքերով, հանդիպեց համապատասխան համայնքների ներկայացուցիչների հետ: Դրան հաջորդեց ԱԺ նախագահի պաշտոնական  ուղերձը աշխարհի բոլոր պառլամենտներին, որպեսզի միջազգայնորեն ճանաչվի քրիստոյան ժողովուրդների  ցեղասպանությունը: Մենք այս հարցում պահանջատեր ենք, ես չեմ հասկանում` ինչ օրենք եք մտցնում, ինչ եք անում, ում համար ենք անում: Չի կարելի Հայոց ցեղասպանությունn անջատել այլ ժողովուրդների  ցեղասպանությունից: Եվ  թող որևէ մեկի սիրտը ստեղ ինձնից շատ չցավի»,- ասել է Շարմազանովը, ով, նշենք, ծագումով հույն է: