Home / Հայաստան / Վարչապետը պատմել է՝ ինչ սկզբունքով է ՀՀԿ-ն կազմել իր ցուցակը

Վարչապետը պատմել է՝ ինչ սկզբունքով է ՀՀԿ-ն կազմել իր ցուցակը

ՀՀԿ-ում ընթանում են դեմոկրատական գործընթացներ, և կուսակցության գործադիր մարմինը բավական երկար և մանրակրկիտ քննարկել է այն սկզբունքները, որոնց համաձայն ձևավորվել են նախընտրական ցուցակները: Այս մասին այսօր ԱԺ-ում լրագրողների հետ զրույցի ժամանակ հայտարարել է ՀՀ վարչապետ Տիգրան Սարգսյանը:

«Հասկանալի է, որ եթե մենք ղեկավարվենք ազգանուններով ու անհատներով, միշտ պրոբլեմներ են լինելու, որովհետև մարդիկ իրենց աշխատանքը, իրենց  կատարած  աշխատանքի արդյունքները տարբեր են գնահատում, և այստեղ կա սուբյեկտիվիզմի վտանգ: Դրա համար մենք բավական երկար քննարկել ենք այն հարցը, թե ինչ սկզբունքներով պետք է ձևավորվի մեր նախընտրական ցուցակը: Այդ սկզբունքների շուրջ մենք եկել ենք համաձայնության: Դա շատ ողջունելի մոտեցում է, որովհետև տրամաբանությունը  հասկանալի է մեր կուսակցական ակտիվին, որովհետև նրանք մասնակցել են այդ սկզբունքների ձևավորմանը», – ասել է ՀՀ վարչապետը:

Տիգրան Սարգսյանը նշել է, որ համաձայն ձևավորված սկզբունքների, համամասնական ցուցակի առաջին շարքը կուսակցության գործադիր մարմինն է զբաղեցրել: Նրա խոսքով՝  տեղերով բաժանումը ոչ թե պայմանավորված է եղել պաշտոններով, այլ հերթականությունը սահմանվել է զուտ ներքին կուսակցական աշխատանքի բաժանման սկզբունքով:

Լրագրողի այն հարցին, թե հնարավոր է Հովիկ Աբրահամյանը նորից դառնա ԱԺ նախագահ, վարչապետն ասել է, որ այսօրվա դրությամբ իրենք ոչինչ չեն բացառում, իսկ շատ հարցերի պատասխաններ ՀՀԿ-ն կտա ընտրություններից հետո: