Ջրաշենում կնոջ դաժան սպանության փաստով քրեական գործ է հարուցվել

Մարտի 21-ին, ժամը 17.55-ին, անհայտ քաղաքացուց  ոստիկանության Արտաշատի բաժնում ահազանգ է ստացվել, որ Ջրաշեն գյուղի բնակիչ Թորգոմ Խուդոյանի տանը դիակ կա:

Դեպքի վայր մեկնած օպերատիվ խումբը տան խոհանոցի հատակին հայտնաբերել է տանտիրուհու՝  74-ամյա Չինար Խուդոյանի դիակը` պարանոցի, կրծքավանդակի և որովայնի կտրած-ծակած վերքերի հետքերով:

Դեպքի վայրի զննությամբ հայտնաբերվել է հանցագործության գործիք դանակը:

Հարուցվել է քրեական գործ սպանության հատկանիշներով:

Ոստիկանության լրատվական ծառայության փոխանցմամբ` կատարվում է նախաքննություն:

Ինչպես ավելի վաղ «Առավոտին» հայտնել էր ֆոտոլրագրող Գագիկ Շամշյանը, դիակի վրա դրված է եղել մի գրություն: Դեպքի վայրում հավաքված հարևանները ֆոտոլրագրողին պատմել են, որ գրության մեջ մասնավորապես գրված է եղել. «Էս քո տղու համար: Ինքը տարավ մեր փողերը: Ես էլ խլեցի քո կյանքը: Հաջորդը մարդդ ա»:

Հայտնի է, որ սպանվածի որդին գտնվում է հետախուզման մեջ՝ մի շարք խարդախություններ կատարելու կասկածանքով:

74-ամյա Չինար Խուդոյանն ապրում էր իր ամուսնու՝ 73-ամյա Թորգոմ Խուդոյանի հետ: