ՀՀԿ-ն ընտրություններին ձգտելու է առավելագույնին. պատգամավոր

ՀՀԿ-ի կարգախոսը պետք է շրջել, որովհետև հավատալը փոխվելու հետևանք է: Այս մասին այսօր լրագրողների հետ հանդիպման ժամանակ հայտարարել է «Ազատ դեմոկրատներ» կուսակցության վարչության փոխնախագահ Անուշ Սեդրակյանը` անդրադառնալով «Հավատանք, որ փոխենք» Հանրապետականների ընտրական կարգախոսին:

Անուշ Սեդրակայնը նշել է, որ տարիներ շարունակ ՀՀԿ-ն տիրապետել է իշխանական և ադմինիտսրատիվ ռեսուրսին, ԱԺ-ում և գործադիրում մեծամասնություն է ունեցել, բայց իրականացրած աշխատանքները դրական և արդյունավետ չեն եղել հայաստանյան իրականության համար:

«Եթե մի կուսակցություն հետևողականորեն իրականացնում է մի քաղաքականություն, որը երկրի համար վատ արդյունքներ է ունենում, ապա  հետևաբար բոլոր սոցիլոգիական հետազոտությունները իրենց ձայնը տալիս են հակառակ կուսակցությանը», – ասել է Անուշ Սեդրակյանը:

Խոսելով նաև ՀՀԿ-ի ցուցակում հայտնված նոր անունների մասին, Սեդրակյանը հիշել է «Նորը դա լավ մոռացված հինն է» թևավոր արտահայտությունը: Նա ընդգծել է, որ շատ գործիչներ կային, որոնք անցել  էին ընդհատակ, բայց հիմա  նույնպես հայտնվել են ՀՀԿ-ի  ցուցակում և նրանց առանձնապես լավատեսական ծրագրեր սպասել պետք չէ:

Ասուլիսի մեկ այլ մասնակից ՀՀ ԱԺ պատգամավոր, ՀՀԿ-ական Վարդան Այվազյանը հակադարձել է Սեդրակյանին` կարծիք հայտնելով, որ ՀՀԿ-ի ընտևացուցակը «շատ գեղեցիկ է»:

Վարդան Այվազյանի խոսքով` ՀՀԿ-ն ի լուր բոլորի հայտարարում է, որ պայքարում է  զուտ իր համար, իսկ բոլորը, չգիտես ինչու, պայքարում են ՀՀԿ-ի դեմ:

Այվազյանն ասել է, որ ՀՀԿ-ն բոլորին կուսակցություններին ընկալում է որպես հավասարաչափ մրցակից, և բոլոր ուժերի նկատմամբ ունի հարգալից վերաբերմունք, այդ իսկ պատճառով պահանջելու է, որ այդ ուժերն էլ լինեն հարգալից իրենց նկատմամբ:

Պատգամավորը նշել է, որ ՀՀԿ-ի առաջնահերթ խնդիրն է ԱԺ-ում ունենալ   առավելագույն ներկայություն:

«Վայ էն քաղաքական թիմին, որ չձգտի առավելագույնին: Հիմա իրանք չունենալով` 25-30 տոկոս են ասում, հիմա մենք նաղդ ունենալով`  չասենք գոնե մի էդքան», – հայտարարել է Այվազյանը: