«Պատասխանատուն Գյումրիի քաղաքապետն է». Ադրբեջանական ֆիլմերի փառատոնի կազմակերպիչներին սպառնում են

Գյումրիում ադրբեջանական ֆիլմերի փառատոնի կազմակերպման նախաձեռնող Խաղաղարար նախաձեռնությունների կովկասյան կենտրոնը նախօրեին Հայաստանի մեծությամբ երկրորդ քաղաքում անցկացված բողոքի ակցիայի, փառատոնի կազմակերպիչների հանդեպ սպառնալիքների և նրանց դեմ նախապատրաստվող միջոցառումների առնչությամբ հայտարարությամբ է հանդես եկել:

Հայտարարության մեջ ասվում է. ««STOP» ադրբեջանական ֆիլմերի փառատոնի դեմ հերթական զրպարտանքի արշավն է սկսվել:

ԶԼՄ-ներում և ապրիլի 11-ին Գյումրիում անցկացված հանրահավաքում կեղծ տեղեկություններ են տարածվել փառատոնի ծրագրում ընդգրկված ֆիլմերի և միջոցառման նպատակների մասին: Պետական և հասարակական գործիչների կողմից ուղիղ սպառնալիքներ են հնչեցվել` թույլ չտալու համար փառատոնի անցկացումը օրենքի խախտման գնով: Նրանց ելույթները միջոցառման կազմակերպիչների, ինչպես նաև փառատոնի անցկացման համար տարածք տրամադրած կազմակերպության` ժուռնալիստների «Ասպարեզ» ակումբի և փառատոնն այցելել պատրաստվող քաղաքացիների հանդեպ բռնի գործողությունների կոչեր էին պարունակում:

Հիմնվելով ադրբեջանական ֆիլմերի փառատոնի դեմ հանրահավաքը լուսաբանող հայկական ԶԼՄ-ների ռեպորտաժների և տեսանյութերի վրա, հաշվի առնելով ականատեսների վկայությունները` հայտարարում ենք, որ փառատոնի շուրջ արհեստական լարվածության ստեղծման, հնարավոր սադրանքների և բռնության դրսևորման համար պատասխանատվություն է կրում Գյումրիի քաղաքապետ Վարդան Ղուկասյանը, որի գլխավորությամբ իրականացվում է տեռորի քարոզչությունը»:

Նախօրեին «Ոչ ադրբեջանական ֆիլմերին» հանրահավաքի ժամանակ Գյումրիում քաղաքի քաղաքապետ Վարդան Ղուկասյանը, մասնավորապես, հայտարարել է. «Ես չեմ հավատում, որ նրանք հայ ազգից են սերում, նրանց արյան մեջ հոսում է թշնամու արյունը: Նման մարդկանց պետք է վռնդել Գյումրիից»:

Բողոքի ակցիայի ընթացքում որոշվել է ապրիլի 12-ին` 11:00-ին պիկետ անցկացնել լրագրողների «Ասպարեզ» ակումբի շենքի մոտ և արգելել փառատոնի մասնակիցների մուտքը շենք: Նրանց գործողությունները կորդինացնելու է հատուկ շտաբը:

Ավելի վաղ Epress.am-ի հետ զրույցում Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը հայտարարել էր, որ չի պատրաստվում հրաժարվել իր մտքից և տարածքը տրամադրելու է փառատոնի կազմակերպիչներին:

«Հարցը կարող է ունենալ երկու կողմ՝ իրավական և բարոյական: Իրավական առումով՝ Հայաստանում գոյություն չունի որևէ օրենք նման ցուցադրությունն արգելելու համար: Բարոյական առումով՝ փորձում են շահարկել պատմական դրվագները, մեր զոհերի արյունը և այլն: Նույն տրամաբանությամբ` ինչո՞ւ են թուրքական կինոներ ցուցադրում «Ոսկե ծիրան» փառատոնին, ինչո՞ւ են մոռանում Ավարայրի ճակատամարտը և պարսիկ ռեժիսորին մրցանակ տալիս: Ես անձամբ Գեորգի Վանյանի հետ շատ տեսակետներ չեմ կիսում, սակայն դա չի նշանակում, որ նա իրավունք չունի ֆիլմ ցուցադրի Հայաստանում», – ասել էր Լևոն Բարսեղյանը:

Լուսանկարը` hraparak.am