«Ժառանգություն» և «Բարգավաճ Հայաստան» կուսակցությունները դատապարտում են թեկնածուների ընտրարշավ անելու իրավունքի ոտնահարումը:
Անդրադառնալով երեկ Մալաթիա-Սեբաստիա համայնքում թիվ 7 ընտրատարածքում պատգամավորության թեկնածու Նիկոլ Փաշինյանի և նրա կողմնակիցների նկատմամբ իրականացված բռնություններին` «Ժառանգություն» կուսակցության ներկայացուցիչ Ռուբեն Հակոբյանը Epress.am-ի հետ զրույցում ասել է, որ նման արարքները դատապարտելի են, անկախ նրանից, թե ում հանդեպ են իրականացվում:
««Ժառանգությունը» ցանկանում է, որ նորմալ ընտրական միջավայր ստեղծվի: Որևէ բռնության արարքներին մենք դեմ ենք: Եթե մեր թեկնածուների դեմ նման ոտնձգությունները կատարվեն, մենք իհարկե միջոցառումներ կիրականացնենք մեր իրավունքները վերականգնելու համար»,- ասել է Հակոբյանը:
«Ամեն ինչ պետք է անել, որպեսզի քաղաքական պայքար ընթանա: Դատապարտելի է նման տհաճ միջադեպերը: Պետք է օրենքով թույլատրելի միջոցներով պաշտպանել թեկնածուների իրավունքները», – նույն թեմային անդրադառնալով` ասել է ԲՀԿ մամուլի խոսնակ Խաչիկ Գալստյանը:
ՀՀԿ-ական պատգամավոր Արտակ Զաքարյանը, սակայն, այլ կերպ է մեկնաբանել Նիկոլ Փաշինյանի դեմ կատարվածը:
«Եթե մարդիկ չեն ցանկանում, որ որևէ մեկն ակցիա անի իրենց մոտ, նրանք իրավունք ունեն չլսելու այդ թեկնածուին», – ասել է Զաքարյանը: