Նախկին կոմունիստի ՀՀԿ-ական մրցակիցը բնակիչներին ահաբեկում է դատախազի և նախագահի անունից

Թիվ 24 ընտրատարածքում մեծամասնական ընտրակարգով առաջադրված ՀՀԿ-ական Հակոբ Հակոբյանն ահաբեկում է ընտրատարածքի բնակիչներին՝ ՀՀ գլխավոր դատախազի և նախագահի անունից: Այս մասին Aravot.am-ի հետ զրույցում ասել է նույն ընտրատարածքում առաջարդված նախկին կոմունիստ Խորեն Սարգսյանը:

Խորեն Սարգսյանն ինքնաառաջադրվել է, սակայն, որոշ լուրերի համաձայն, նրան ոչ պաշտոնապես ԲՀԿ-ն է սատարում, սակայն ինքը պնդում է. «Ինձ ատարում են բոլորը, բացի ՀՀԿ-ից»:

Ըստ Սարգսյանի` բոլոր այն գյուղերում, որտեղ ինքը նախընտրական հանդիպումներ է ունենում, ՀՀԿ-ական մրցակցի կողմնակիցները «զրույցներ» են անցկացնում գյուղապետերի հետ:

Նախորդ օրն էլ հերթական ընտրական միջադեպն է գրանցվել: Հակոբ Հակոբյանի կողմնակիցներն անտառտնտեսության տարածքում, որի պետն իր հորեղբոր տղան է՝ ծեծի են ենթարկել Արծվանիստի գյուղապետ Սամվել Օհանյանին: Վերջինիս այսօր առավոտյան տեղափոխել են մայրաքաղաքի հիվանդանոցներից մեկը: Խորեն Սարգսյանի նախընտրական շտաբը պատրաստվում է դեպքի առիթով դիմել պատկան մարմիններին՝ սահմանված կարգով:

Դեպքի առիթով Aravot.am-ի հետ զրույցում Հակոբ Հակոբյանն ասել է. «Խորեն Թռչունիչին ասեք՝ իր դիմումները, որ գրում ա, տառասխալներով, կտամ «Առավոտ» թերթում տպելու, եթե մյուս անգամ զբաղվի հերյուրանքներով»: Հարցին, թե ինչ դիմումի մասին է խոսքը, Հակոբյանն ասել է. «Ես խնդրում եմ, իրան ասեք, քանի որ ինքն էլ ա համագյուղացի, ծովինարցի ա, չեմ ուզում իրան վարկաբեկել: Իրան ասեք՝ հենց որ շարունակեց, էդ դիմումը թերթերով կտպեմ: Իսկ էդ մնացած ամեն ինչը հերյուրանք ա»: