Տղամարդը հեռացվել է Գյումրիի քաղաքապետարանից, քանի որ չի նվիրաբերել աշխատավարձը

Այսօր ՀՀ կառավարության շենքի մոտ Գյումրիի ինքակառավարման և դատական մարմինների անօրինությունների դեմ բողոքի ակցիա էր անցկացնում քաղաքի բնակիչ Հենրիկ Մալխասյանը: Epress.am-ի հետ զրույցում նա պատմել է, որ իր բողոքը կապված է այն բանի հետ, որ քաղաքապետ Վարդան Ղուկասյանը իրեն հեռացրել է աշխատանքից` իբր խուլիգանություն անելու համար, և 30,000 դրամ տուգանք է պահանջել:  ՀՀԿ-ական քաղաքապետի արարքի իրական պատճառը, ըստ Մալխասյանի, այն է, որ վերջինս հրաժարվել է իր մի ամսվա աշխատավարձը և մի տարվա արձակուրդայինը (ընդհանուր` 124 հազար դրամ) նվիրաբերել Գյումրիի քաղաքապետարանի  մասնաշենքի կառուցապատման համար:

Մալխասյանն իրեն առանց որևէ իրավական հիմքի աշխատանքից ազատելու համար քաղաքացիական հայցով դիմել է Շիրակի առաջին իրավասության դատարան իր  նկատմամբ սուտ տեղեկություններ տարածելու մեղադրանքով, սակայն  գործը չի քննվում: Դատավոր Լիլիթ Խաչատրյանը Մալխասյանի միջնորդություններն արդեն 3 ամիս է` չի ընդունում:

2011 թվականի հունիսի 24-ից Շիրակի մարզի քննչական բաժին Մալխասյանը ևս մեկ` այս անգամ  քրեական հայց  է ներկայացրել: Քաղաքապետարանի նախկին աշխատակիցը տրամադրել է փաստեր, որոնք վկայում են քաղաքապետի և հարկային  բաժնի պետ «դրամաշորթ Փափազյանի» կողմից 10  միլիոն դրամ  քաղաքապետարանի ֆոնդից գողանալու մասին: Գործը սակայն դեռ վարույթի մեջ չէ:

«Ես մտավախություն ունեմ, որ դատավորները համագործակցում են  քաղաքապետի և այլ աշխատողների հետ, որպեսզի չբավարարեն իմ դիմումը»,- ասել է Հենրիկ Մալխասյանը:

Նա ժամանել էր Երևան` դեպքի առնչությամբ բողոքի նամակ ներկայացնելու ՀՀ նախագահ Սերժ Սարգսյանին և ՀՀ գլխավոր դատախազին: