Սամվել Ալեքսանյանը, փաստորեն, փող ունի

ՀՀ ԱԺ պատգամավոր Սամվել Ալեքսանյանը ոչ մի բիզնես չունի, բայց միևնույն է` շահաբաժիններ է ստանում:

Այս տվյալները ներառված են որպես պատգամավորի թեկնածու նրա` ԿԸՀ ներկայացրած գույքի և եկամուտների հայտարարագրում:

Ըստ հայտարարագրի, Ալեքսանյանի վերջին մեկ տարվա եկամուտը կազմել է 18 մլն 415 հազար դրամ, որից 3 մլն 25 հազարը եղել է նրա` որպես պատգամավոր ստացած աշխատավարձը, 11 մլն 250 հազար դրամը ստացել է որպես շահաբաժին` «Կարմիր առագաստներ» ՍՊԸ-ից, իսկ 3 մլն 300 հազարը ստացել է «Ս.Վ.Ս» ՍՊԸ-ից:

ԱԺ պատգամավորության թեկնածուն 2012-ի մարտի 1-ի դրությամբ, բանկային հաշիվներում ունեցել է 380 մլն դրամ և 9 մլն 385 հազար դոլար: Նա հայտարարագրել է չորս շինություն, վեց հողամաս և չորս ավտոմեքենա` երկու «Մերսեդես Բենց», որոնցից մեկը «500» մոդելի, մյուսը` «600», մեկական «Ռենջ-Ռովեր» և «Վազ 21124» մակնիշի:

Ըստ հայտարարագրի, նա չունի ոչ մի գույք, որի արժեքը կգերազանցի ութ միլիոն դրամը, բայցևայնպես, ստացվում է, խաբել է` ասելով, թե նախընտրական քարոզարշավի փող չունի, գրում է «Հայկական ժամանակ» օրաթերթը:

Քարոզարշավի համար կարելի է ծախսել առավելագույնը տասը միլիոն դրամ, որի 38-ապատիկ նա ունի բանկային հաշվում: