Կոմունիստին մեղադրում են. ասուլիսը մեկնարկեց միջադեպով (ՏԵՍԱՆՅՈՒԹԵՐ)

Հայաստանի կոմունիստական կուսակցության (ՀԿԿ) ղեկավար Ռուբեն Թովմասյանն այսօր «Հայելի»  ակումբում հայտարարեց, որ խորհրդարանական ընտրությունների արդյունքում Կոմկուսն ունենալու է ընտրողների ձայների 10-15 տոկոսը:

Aravot.am-ի փոխանցմամբ` ՀԿԿ ղեկավարի ասուլիսը դեռ նոր էր մեկնարկել, երբ հայտնվեց մի անձնավորություն, որը ներկայացավ իբրև Մյասնիկ Պատվականյան և ցանկացավ հարցեր հղել գլխավոր կոմունիստին: Սակայն  Թովմասյանի համակիրները նրան մամուլի սրահից այնպես դուրս հանեցին, որ Մյասնիկ Պատվականյանը նույնիսկ գլուխը խփեց պատին:

Միջանցքում Պատվականյանը հայտարարեց, թե պարոն Թովմասյանը խաբեությամբ է զբաղվում և բոլոր երիտասարդներին հեռացնում է Կոմկուսի շարքերից: Պատվականյանը նաև մանրամասնեց. «Այդ մարդը 20 տարի զրպարտչական, կազմաքանդիչ գործունեություն է ծավալել, քանդել Կոմկուսը: Նա կոմկուսի շարքերից հեռացրեց մի շարք երիտասարդների, գաղտնի պլենում հրավիրեց, նախընտրական ցուցակը կազմեց, ինձ էլ խոստացել էր ընդգրկել ցուցակում, չընդգրկեց: Ես միշտ եղել եմ և կմնամ կոմունիստ, սակայն այդ անձը հակակոմունիստական և հակաժողովրդական քարոզչություն է իրականցնում: Իր 80-ամյա զառամյալ ծանոթ-բարեկամներին է բերում կուսակցություն: Պահանջում եմ, որ նրան հեռացնեն Կոմկուսի շարքեից»:

Երբ լրագրողները վերադարձան մամուլի սրահ, գլխավոր կոմունիստի համակիրները Մյասնիկ Պատվականյանին սպառնացին. «Դու դեռ կտեսնես»:

Միջադեպի կապակցությամբ Թովմասյանն ասաց, թե գիտի՝ այդ անձնավորությունը որ ուժի կողմից է ուղղորդվում և պարզաբանեց. «Ես նրան չեմ խոստացել ընդգրկել ցուցակում, ինչո՞վ եմ հալածում, չեմ հասկանում: Եթե հավատում եք նրան՝ հավատացեք»:

Շարունակելով ասուլիսը՝ պարոն Թովմասյանն ասաց, որ խորհրդարան մտնելով իրենք սկսելու են սահմանադրական բարեփոխումները և նկատեց. «Այս սահմանադրությունը չի համապատասխանում հայ ժողովրդի պատմությանը: Այն քսերոքս է արված»:

Դառնալով սոցհարցումներին՝ գլխավոր կոմունիստը նշեց. «Ով վճարում է, նա էլ պատվիրում է երաժշտությունը»:

Տեսանյութերը` Aravot.am

Լուսանկարը` Yerkirmedia.am