Սարկոզին զիջեց առաջին փուլում. նախագահին կընտրեն մայիսի 6-ին

Կիրակի Ֆրանսիայում կայացած նախագահական ընտրությունների առաջին փուլի արդյունքում հաղթել է Սոցիալիստական կուսակցության առաջնորդ Ֆրանսուա Օլանդը: Գործող նախագահ Նիկոլա Սարկոզին նրանից հետ է մնում 1,5%-ով: Օլանդն ու Սարկոզին արդեն երկուսով մայիսի 6-ին կմրցեն ընտրությունների երկրորդ փուլում:

Ֆրանսիայի Ներքին գործերի նախարարության տվյալներով` բոլոր քվեաթերթիկների հաշվարկի արդյունքում Օլանդը հավաքել է ձայների 28,6 %-ը. Սարկոզին` 27,1%-ը:

Սա Ֆրանսիայի պատմության մեջ գործող նախագահի աջակցության ամենացածր ցուցանիշն է: 1958 թվականին Հինգերորդ հանրապետության ստեղծումից հետո սա առաջին դեպքն է, երբ երկրի գործող նախագահը չի հաղթում ընտրությունների առաջին փուլում:  Հիշեցնենք, որ Սարկոզին նախագահ է դարձել 2007 թվականին` առաջ անցնելով բոլոր 9 թեկնածուներից:

Օլանդին և Սարկոզիին այս փուլում հաջորդում է ուլտրաաջերի առաջնորդ Մարեն Լը Պենը, ում հաջողվել է ստանալ ֆրանսիացիների ձայների 18%-ը: Սա նույնպես լավագույն ցուցանիշն է ֆրանսիացի ուլտրաաջերի համար:

Ընտրություններին մասնակցությունը բարձր է եղել` 80%, իսկ նախընտրական քարոզարշավի հիմնական թեման տնտեսությունն էր:

Սահմանադրական խորհուրդը չորեքշաբթի կհրապարակի ընտրությունների վերջնական արդյունքները:

Ինչպես գրում է BBC-ն, առաջին փուլը ցույց տվեց, որ ֆրանսիացիները դժգոհ են և մտահոգ ներկա իրավիճակով: Նրանք իրենց անվտանգության մեջ չեն զգում:

Առաջին փուլը նաև ցույց տվեց, որ Եվրամիության տնտեսական ճգնաժամը բացասաբար է ազդում գործող ղեկավարների վարկանիշի վրա: