Epress.am Լուրեր Հայաստանից
Այսօր ՀՀ ԿԳ նախարարի տեղակալ Մանուկ Մկրտչյանն ու ՀՀ ԿԳ նախարարության աշխատակազմի ղեկավար Մհեր Ղազարյանը Երևանի Վ.Բրյուսովի անվան պետական լեզվաբանական համալսարանի դասախոսներին ներկայացրել են ռեկտորի ժամանակավոր պաշտոնակատար Գայանե Գասպարյանին: Մանուկ Մկրտչյանը հայտնել է, որ Գասպարյանը կզբաղեցնի պաշտոնը մինչև սահմանված կարգով կանցկացվի ռեկտորի ընտրության մրցույթ, որին մասնակցելու հայտ կարող են ներկայացնել բոլոր ցանկացողները:
Տեղեկացնենք, որ նախկին ռեկտոր Սուրեն Զոլյանի հեռացման մասին ԿԳՆ որոշումից դժգոհ ուսանողները չեն դադարեցնում պայքարը հանուն Զոլյանի վերադարձի և այսօր կազմակերպվելու են լուռ հավաք համալսարանի բակում, ապա շարժվելու են դեպի Կրթության և գիտության նախարարություն:
«Այս պահից սկսած մեր կարգախոսը դառնում է «ՉԿԱ ԶՈԼՅԱՆ, ՉԿԱՆՔ ՄԵՆՔ», և այդ պահից մեր պայքարը տեղափոխվում է փողոց, այնքան ժամանակ, մինչև մենք չհասնենք մեր օրինական պահանջի կատարմանը»,- ասված է ակտիվիստների տարածած հաղորդագրության մեջ:
Ինչպես Epress.am-ին հայտնել է ուսանողներից Միքայելը, այսօրվա հավաքին Լեզվաբանական համալսարանի ուսանողներին սատարելու են նաև այլ բուհերի ուսանողներ: