Ակտիվիստները «հավատացին» և «փոխվեց». Սերժ Սարգսյանը կողմ է կրպակների ապամոնտաժմանը

ՀՀ նախագահ Սերժ Սարգսյանն այսօր այցելել է Մաշտոցի պուրակ և հորդորել է Երևանի քաղաքապետ Տարոն Մարգարյանին ապամոնտաժել տեղադրված կրպակները:

«Տարո՛ն, Աբովյան փողոցը կրպակներից մաքրելը քո մեծ ձեռքբերումն է: Մեր բոլորի ձեռքբերումն է: Դու ճիշտ ես վարվել նաև մարդկանց սեփականության իրավունքի  հետ կապված հարցերում: Այո՛, չի կարելի անօրինականությամբ օրինականություն հաստատել: Եվ չի կարելի անօրինական գործողություններով հարմարավետություն ստեղծել: Ամեն ինչ շատ ճիշտ ես արել: Ճիշտ ես վարվել նաև այն առումով, որ ժամանակավոր որոշում ես կայացրել: Փաստորեն, 2-3 տարում այստեղից պետք է հանվեր այս ամբողջը, բայց, Տարո՛ն ջան, ինքդ էլ ես տեսնում, որ սա այդքան էլ գեղեցիկ չէ: Նորից եմ կրկնում՝ քաղաքապետարանը շատ արդյունավետ է աշխատել: Ճիշտ որոշում եք կայացրել, բայց, իրոք, գեղեցիկ չէ, և լավ կլինի, որ ձևը գտնես, այս ամենն ապամոնտաժեք: Սա կլինի շատ ճիշտ որոշում: 2-3 տարի այս պատկերը չի կարող մեր «աչքը շոյել», իսկ մենք ասել ենք, որ ամբողջ Երևանում աչք շոյող կառույցներ պետք է լինեն, կրկնում եմ՝ օրինական ճանապարհով», – ՀՀ նախագահի մամուլի գրասենյակը փոխանցում է Սերժ Սարգսյանի խոսքերը:

Նշենք, որ ի պատասխան Սերժ Սարգսյանի հորդորի, Տարոն Մարգարյանն ասել է. «Հանրապետության նախագահի առաջարկությամբ վաղը` աշխատանքային օրվա ընթացքում, որոշում կկայացնեմ Մաշտոցի պուրակի կրպակների ապամոնտաժման վերաբերյալ: Սեղմ ժամկետներում կապամոնտաժենք կրպակները և կշարունակենք բարեկարգման աշխատանքները»:

Նախագահականից ուղարկված հաղորդագրության մեջ նշվում է, որ Սերժ Սարգսյանին է մոտեցել նաև Մաշտոցի պուրակի բնապահպան ակտիվիստներից մեկը և նրա կարծիքը հարցրել պուրակում ժամանակավորապես տեղադրված տաղավարների մասին:

Սերժ Սարգսյանը տեղեկացրել է իր մոտեցման և քաղաքապետին տված ցուցումի վերաբերյալ՝ միաժամանակ ընդգծելով. «Այո՛, մեզնից յուրաքանչյուրը ցանկանում է, որ իր քաղաքը գեղեցիկ լինի, որ բոլոր բնապահպանական կանոնները պահպանվեն, բայց այդ ամբողջը պետք է անենք օրինական ճանապարհով: Սա՛ է իմ մոտեցումը»:

Սերժ Սարգսյանը Մաշտոցի պուրակում իրենց ծառայողական պարտականությունները կատարող ոստիկանների աշխատանքը ևս բարձր է գնահատել, շնորհակալություն հայտնել և ընդգծել, որ «հասարակական կարգի պահպանման ուղղությամբ նրանք մի քանի քայլ առաջ են գնացել, ու դա տեսանելի է ինչպես իր, այնպես էլ մեր ամբողջ հանրության համար»:

Սերժ Սարգսյանը հորդորել է ոստիկաններին ձեռք բերվածը բավարար չհամարել, կանգ չառնել և անընդհատ կատարելագործվել:

Նշենք, որ Մաշտոցի պուրակում կրպակների ապամոնտաժման դեմ ակտիվիստները պայքարում են 80 օրից ավելի: