Պատգամավորի թեկնածուի շտաբը` խախտումների մասին

Թիվ 12 ընտրատարածքում մեծամասնական ընտրակարգով առաջադրված Տիգրան Տեր-Պետրոսյանի վստահված անձինք արձանագրել են մի շարք ընտրախախտումներ, որոնք ներկայացրել է թեկնածուի շտաբը.

«Թիվ 12 ընտրատարածքի 12/02 ընտրական տեղամասում քաղաքացին եկել է  ընտրության, սակայն իր փոխարեն քվեարկված է եղել և Տիգրան Տեր-Պետրոսյանի վստահված անձը համապատասխան արձանագրություն է կազմել:

12/02 տեղամասում մի քաղաքացի փորձել է ստորագրել իր թոռան փոխարեն, սակայն Տիգրան Տեր-Պետրոսյանի վստահված անձը նկատել և կանխել է դա:

12/27 տեղամասում երիտասարդը մեծահասակի  անձնագրով փորձել է քվեարկել, սակայն այս փորձը ևս կանխվել է  Տիգրան Տեր-Պետրոսյանի վստահված անձի կողմից:

Իսկ հանձնաժողովի անդամները ձայն չեն հանել, որ կա նման խնդիր:

 

Թիվ 12 ընտրատարածքն ընդգրկող Նոր Արեշ 35 փողոցի 127/1 շենքի բակում մեր շտաբի անդամները նկատել են, որ այնտեղ ընտրակաշառք են բաժանում` թիվ 12 ընտրատարածքում պատգամավորության թեկնածու Ռոբերտ Մասումյանին ընտրելու համար:

«Հայկական ժամանակ» օրաթերթի արտահաստիքային թղթակիցը մեզ տեղեկացրել է, որ 12/32 և 12/33 ընտրատեղամասերի դիմաց հավաքված են եղել մի քանի տղամարդ և երկու կին, որոնցից մեկը տղամարդկանց հարցրել է, թե «փողը երբ են տալու»: Երբ լրագրողը մոտեցել և հարցրել է, թե ինչ փողի մասին է  խոսքը, այդ խումբը սկսել է  բղավել լրագրողի վրա, իսկ մի տղամարդ էլ փորձել է նրա ձեռքից խլել  ֆոտոխցիկը, սակայն չի հաջողվել: Այնուհետև լրագրողին սկսել է  հետապնդել մի մեքենա:

12/34 և 12/37 ընտրատեղամասերի դիմաց 267 համարի երթուղայիններով մարդկանց են բերել քվեարկության և ուղղորդել են, որ քվերակեն համար յոթի և չորսի օգտին: Համամասնական ցուցակում յոթերորդ համարը ՀՀԿ-ն է, իսկ մեծամասնականում համար չորսը  թիվ 12 ընտրատարածքում պատգամավորի թեկնածու ՕԵԿ-ական Ռոբերտ Մասումյանն է:

12/34 ընտրական տեղամասում  ՀՀԿ-ն բաժանել է ուղղորդող թերթիկներ, որոնց վրա համամասնականի դեպքում նշված է համար 7-ը` ՀՀԿ-ն, իսկ մեծամասնականում` համար 4-ը` Ռոբերտ Մասումյանը:

12/01 ընտրական տեղամասում քաղաքացիների անունները պատի վրա փակցված ընտրացուցակներում բացակայում են, բայց  հանձնաժողովի անդամների մոտ գտնվող ցուցակում նրանց անունները կան:

12/36 ընտրական տեղամասում լրացուցիչ ցուցակներում գտնվող մարդիկ չգիտեն իրենց բնակության հասցեները»: