Երդումից հետո Պուտինը ներգաղթյալներին քննության ենթարկելու որոշում է կայացրել

Ռուսաստան ներգաղթած արտասահմանցիները ընթացիկ տարվա նոյեմբերից պարտադիր կերպով պետք է ռուսերենի, Ռուսաստանի պատմության և ՌԴ Սահմանդրության քննություն հանձնեն, հայտնում է BBC-ի ռուսաստանյան ծառայությունը:

«Ազգամիջյան համաձայնագրի ապահովման մասին» հրամանը ստորագրվել է Վլադիմիր Պուտինի կողմից` մայիսի 7-ին տեղի ունեցած երդման արարողությունից ընդամենը մի քանի ժամ անց:

Հրամանում ասվում է, որ կառավարությունը պետք է 2012-ի նոյեմբերին պարտադիր քննություն սահմանի ներգաղթյալների համար, բացառությամբ բարձր որակավորում ունեցող մասնագետների:

Տեքստում ասվում է, որ որոշումը կայացվել է «ազգամիջյան հարաբերությունները հավասարակշռելու նպատակով»`ՌԴ բազմազգ բնակչության «միասնականության ամրապնդման և դրա իրավահավասար զարգացման ապահովման համար»:

Ապրիլի վերջին արդեն նախկին նախագահ Դմիտրի Մեդվեդևը հավանություն էր տվել մինչև 2025 թվականը միգրացիոն քաղաքականության մասին հայեցակարգին: