Ապարանից՝ նախագահի նստավայր. Սերժ Սարգսյանին տեղեկացրեցին, որ դպրոցը փակում են (ՏԵՍԱՆՅՈՒԹ)

Ապարան քաղաքի ֆիզմաթ դպրոցը փակելու որոշումը, որը կայացվել է մարտ ամսին, վրդովվեցրել է դպրոցի սաներին, նրանց ծնողներին և ուսուցիչներին, ինչպես նաև քաղաքի բնակիչներին:

Այսօր նրանք դպրոցի փակման դեմ իրենց բողոքն են արտահայտել Երևանում՝ ՀՀ նախագահի նստավայրի մոտ: Դպրոցի տնօրեն Մանվել Պետրոսյանը ու ծնողներից մի քանիսը իրենց խնդիրը նամակով ներկայացրել են նախագահականի նամակների բաժին:

Մանվել Պետրոսյանը Epress.am-ի հետ զրույցում տեղեկացրել է, որ 2009 թվականին իր ղեկավարած ֆիզմաթ դպրոցը որոշել են միավորել Ապարան քաղաքում գործող  ավագ դպրոցին, բայց վարչապետի և նախարարի  հրամանով այդ նախագիծը կառավարության նիստի օրակարգից դուրս է մնացել:

«Անցյալ տարի նորից այս հարցը բարձրացրացավ, նորից մտավ կառավարության նիստի օրակարգ, բայց էս անգամ արդեն դեմ էին Արագածոտնի մարզպետը և տարածքային կառավարման նախարարը: Այդ ժամանակ՝ օգոստոսին, չանցավ, այս տարի արդեն մարտի 1-ին, այնուամենայնիվ, միանգամից անցկացրեցին կառավարության նիստում, ու հունիսի 20-ից մենք արդեն միավորված ենք ավագ դպրոցին: Այս ակցիան երեխաներն ու ծնողներն  իրենք են նախաձեռնել:

Խնդրի հետ կապված մենք տարածաշրջանում ստորագրահավաք կազմակերպեցինք: Այս երեխեքը բքի ու ցրտի ժամանակ՝ մարտի սկզբներին, գյուղեգյուղ ընկած ստորագրահավաք էին կազմակերպում, 8000 ստորագրություն հավաքեցին: Դա ներկայացրել ենք նախագահին, նա ուղարկել էր կառավարություն, այնտեղից էլ նախարարություն, որտեղից  մեզ պատասխանել են, որ այդ որոշումը բեկանման ենթակա չէ: Նույնիսկ ինձ, մեր ուսուցիչներին նախարարը կանչեց և ասեց, որ  բեկանման ենթակա չի», – ասել է Մանվել Պետրոսյանը:

Նա տեղեկացրել է, որ իրենց նամակի տակ ստորագրել են  ակադեմիկոսներ, թղթակից անդամներ, որոնք ծանոթ  են դպրոցին ու ափսոսում են, որ այն պետք է փակվի: Նշենք, որ այս դպրոցը հիմնադրելու գաղափարը տվել է ակադեմիկոս Վիկտոր Համբարձումյանը:

Ֆիզմաթ դպրոցի աշակերտ Սերգեյ Պետրոսյանը մեզ հետ զրույցում տեղեկացրել է, որ իրենց դպրոցում սովորում է 120 աշակերտ, որոնցից 40-ը գյուղերից են գալիս:  «Այժմ, եթե այս դպրոցը փակվի, այդ 40 հոգին կգնան իրենց գյուղերի դպրոցները ու կզրկվեն որակյալ կրթություն ստանալու հնարավորությունից», – ասել է աշակերտը:

11-րդ դասարանի աշակերտ Արթուր Կոստանյանն  էլ ասել է  հետևյալը. «Ակցիայի հիմնական նպատակը նա է, որ նախագահը տեղյակ լինի, որ Ապարանում ֆիզմաթ դպրոցը փակում են: Ապարանում ավագ դպրոցն է,  մեկ էլ՝ ֆիզմաթ դպրոցը: Եթե ֆիզմաթը փակեն, կմնա ավագը, ու մենք պարտադրված, ստիպված պետք է գնանք ավագ դպրոց, այսինքն` մեր որակյալ կրթություն ունենալու, մեր ընտրություն կատարելու իրավունքը խախտվում է: Մենք եկել ենք, որ մեր իրավունքները պաշտպանենք»,- ասել է Արթուր Կոստանյանը:

Նախագահականի մոտ մի քանի ժամ մնալուց հետո բողոքողներին տեղյակ են պահել, որ իրենց հարցով հանձնարարական է ուղարկվել ՀՀ կրթության և գիտության նախարարություն: Նախարարությունից ապարանցիներին պետք է պատասխանեն երեք օրից: