Home / Տեսանյութեր / «Բեթմենները» հարձակվել են կինոթատրոնների վրա ֆիլմի ցուցադրության ժամանակ

«Բեթմենները» հարձակվել են կինոթատրոնների վրա ֆիլմի ցուցադրության ժամանակ

Ամերիկյան կոմիքսների սուպերհերոս Բեթմենի դիմակներով երեք զինված անձինք հարձակում են գործել մեքսիկական երկու կինոթատրոնների վրա «Սև ասպետը. լեգենդի վերածնունդը» ֆիլմի ցուցադրության ժամանակ, հայտնում է Agence France-Presse-ը: Կողոպուտը տեղի է ունեցել երկուշաբթի գիշերը ԱՄՆ-ի հետ սահմանի վրա գտնվող Չիուաուա նահանգում:

Առաջին հարձակումը տեղի է ունեցել կեսգիշերից որոշ ժամանակ անց: Սևազգեստ և զինված երեք անձինք Բեթմենի դիմակներով թալանել են Cinepolis կինոթատրոնի դրամարկղը: Այնուհետև նրանք հարձակվել են միևնույն քաղաքում գտնվող Cinemax կինոթատրոնի վրա: Հանցագործներին հաջողվել է 18 հազար դոլար գողանալ:

«Սև ասպետը. լեգենդի վերածնունդը» ֆիլմի ցուցադրությունները ողջ աշխարհում ուղեկցվում են անվտանգության խստացված միջոցառումներով: Հուլիսի 20-ին ֆիլմի պրեմիերայի ժամանակ ամերիկյան Ավրորա քաղաքում տեղի բնակիչ Ջեմյս Հոլմսը սպանել էր 12 մարդկանց և վիրավորել 60 հանդիսատեսների: Ձերբակալվելուց հետո տղամարդը հայտնել էր ոստիկանությանը, որ ինքը Ջոկերն է՝ Բեթմենի մասին էկրանավորված կոմիքսներում հերոսի գլխավոր հակառակորդը: Նրա գործողությունների դրդապատճառներն անհայտ են մնում: