Հայաստանի գործարարների միությունն ասել է՝ ինչով կարող է օգնել սիրիահայերին

Հայաստանի արդյունաբերողների և գործարարների (գործատուների) միությունը խորապես մտահոգված է Սիրիայում բնակվող հայերի ճակատագրով, ասված է Միության հայտարարության մեջ:

«Քաղաքական հայտնի իրադարձությունների պատճառով այսօր նրանք հայտնվել են դժվարին կացության մեջ և բնականաբար հայացքը ուղղել են մայր Հայրենիքին… Հայաստան եկող հատկապես գործարարների համար առաջնահերթ անելիքներ ունի Հայաստանի արդյունաբերողների և գործարարների (գործատուների) միությունը, որի նախագահության նիստը սիրիահայերին աջակցելու վերաբերյալ ընդունեց գործնական որոշում» , –  նշված է հայտարարության մեջ։

Այսպիսով, Միությունը պատրաստ է.

– Տրամադրել աշխատատեղ կամ հնարավորության դեպքում ստեղծել նոր աշխատատեղեր սիրիահայերի համար

– Խորհրդատվությամբ, Միության կապերն ու մյուս լծակները օգտագործելով՝ աջակցել սիրիահայ գործարարներին Հայաստանում բիզնես հիմնելու, նրանց    գործող  բիզնեսը արտերկրից Հայաստան տեղափոխելու գործում

– Աջակցել   Միության անդամ ընկերություններում ներդրումներ կատարել ցանկացողներին, նպաստել նրանց ինտեգրմանը Հայաստանի գործարար և բարոյահոգեբանական մթնոլորտին

– Կազմակերպել մասնագիտական սեմինարներ կամ վերաորակավորման ուսուցման դասընթացներ սկսնակ գործարարների համար

– Գործարարությամբ զբաղվողներին ծանոթացնել Հայաստանի տնտեսական օրենսդրությանը, փոփոխություններին՝ նոր իրավիճակներում արագ և ճիշտ կողմնորոշվելու համար

– Անհրաժեշտության դեպքում հնարավորության սահմաններում աջակցել սիրիահայ ուսանողներին կրթաթոշակների վճարման գործում:

Միության ներկայացուցիչները նշում են, որ Միությունում ստեղծվել է աշխատանքային խումբ, համակարգվում են բոլոր տեղեկությունները և առաջարկությունները սիրիահայերի խնդիրները լուծելու համար։ Միաժամանակ՝ աշխատանքային խումբը համագործակցելու է Հայաստանի Սփյուռքի և Արտաքին գործերի նախարարությունների և խնդրին առնչվող  պետական ու հասարակական տարբեր կառույցների հետ։