«Ո՞ւմ եկեղեցին ո՞ւմ ես վաճառում». Թուրքիայում լրագրողին կոչ են անում եկեղեցին հայերին վերադարձնել

Թուրքիայում հայ համայնքի անդամները կոչ են արել Habertürk պարբերականի գլխավոր խմբագիր Ֆաթիհ Ալթայլիին վերադարձնել Վանում իր պապից ժառանգած եկեղեցին:

Ալթայլին Բակրաչլի գյուղում գտնվող «Յոթ եկեղեցիներ» համալիրի սեփականատեր է ճանաչվել Վանի մշակութային հարցերով վարչության կողմից եկեղեցիների վերականգնողական ծրագրի իրագործման ընթացքում:

Հաստատելով այն, որ եկեղեցին պատկանել է իր պապին՝ Ալթային նկատել է. «Ոչ ոք ինձ որևէ բան չի ասել հարցի վերաբերյալ: Ես բոլոր անհրաժշետ լիազորությունները պետությանը կհանձնեի: Եթե պետությունը խնդրեր ինձ վաճառել այն, ես կվաճառեի: Ի՞նչ պիտի անեմ եկեղեցու հետ»:

Բացի դա, նա նշել է, որ չունի համապատասխան ֆիանանսական միջոցներ եկեղեցին անձամբ վերականգնելու և պահպանելու համար:

Ալթայլիի՝ հայկական եկեղեցու սեփականատեր լինելու փաստը քննարկումների առիթ է դարձել լրատվամիջոցներում և սոցցանցերում, մասնավորապես, հայերի և ազատական գաղափարախոսությունը կրող քաղաքական և հասարակական ուժերի շրջանում: Ակտիվիստ և գրող Հայկո Բաղդադը, ով արշավ է սկսել սոցցանցում՝  կոչ անելով Ալթայլիին վերադարձնել եկեղեցին, Today’s Zaman-ին հայտնել է. «Քանի որ Ալթայլին հասարակության մեջ հայտնի գործիչ է, նա կարող է հնարավորություն ընձեռել քննարկելու, թե ինչ է տեղի ունեցել այն հայերի սեփականության հետ, ովքեր այլևս այստեղ չեն»:

Բաղդադը քննադատաբար է վերաբերվում Ալթայլիի՝ եկեղեցու հնարավոր վաճառքի հեռանկարին. «Ո՞ւմ եկեղեցին ո՞ւմ ես վաճառում»:

Նա կոչ է արել հանրությանը հետաքրքրվել՝ ինչպես է նախկինում այս հողերի վրա ապրող հայերի սեփականությունը վերաբաշխվում: Բաղդադը նշել է, որ ներկայումս ստորագրահավաք է սկսվել, որի հեղինակները կոչ են անում Ալթայիին վերադարձնել ժառանգած եկեղեցին:

Հայկական քաղաքացիական հասարակության ակտիվիստ Գարո Փայլանը Today’s Zaman-ի հետ զրույցում հայտարարել է, որ Թուրքիայում ներկայումս 2000 հայկական եկեղեցիներ կան, որոնցից 1500-ը գտնվում են գյուղերում և փոքր քաղաքներում և լուրջ վերականգնման կարիք ունեն: «Յոթ եկեղեցիներ» համալիրը, որը ներկայումս Ալթայլիի սեփականությունն է, համեմատաբար լավ վիճակում գտնվող հազվադեպ, պատմական հուշարձաններից է», – նշել է Փայլանը՝ հավելելով, որ  այս շինությունների իսկական սեփականատերերից ոչ ոք կենդանի չէ:

Փայլանը հույս ունի, որ այս դեպքը թույլ կտա բարձրացնելու խնդրի վերաբերյալ հանրային իրազեկման մակարդակը: