Փաշինյանը վարչապետին հարց էր ուզում տալ. վերջինս հեռացել էր

ՀՀ 2011 թվականի պետբյուջեի կատարողականի հաշվետվության հիմնական զեկուցող ՀՀ վարչապետ Տիգրան Սարգսյանին ԱԺ պատգամավորները հնարավորություն չունեցան հարցեր տալու, քանի որ գործադիրի ղեկավարը հեռացավ դահլիճից իր ելույթից հետո:

Այնուհետև, երբ մեկ այլ հիմնական զեկուցող ՀՀ գլխավոր գանձապետ Ատոմ Ջանջուղազյանը սկսել է իր ելույթը՝ ԱԺ ՀԱԿ խմբակցության պատգամավոր Նիկոլ Փաշինյանը վարման կարգի վերաբերյալ հարց է հնչեցրել:

«Երբ որ ներկայացվեց Տիգրան Սարգսյանը, ասվեց, որ ձայնը տրվում է  հիմնական զեկուցողին: Հիմա ես հարցեր ունեմ հիմնական զեկուցողին, խնդրում եմ հիմնական զեկուցողին հրավիրեք դահլիճ, որ կանոնակարգի համաձայն հարցեր տանք», – ասել է Նիկոլ Փաշինյանը:

ԱԺ փոխնախագահ Էդուարդ Շարմազանովը նշել է, որ հիմնական զեկուցող է նաև Ատոմ Ջանջուղազյանը, և պատգամավորները կարող են հարցեր նաև նրան տալ: Շարմազանովը հավելել է, որն եթե Փաշինյանը ցանկություն ունի հարցեր տալու վարչապետին, ապա կարող է գրանցվել ժամը 16:30-ի համար և հարցն ուղի կառավարության հետ հարց ու պատասխանի ժամանակ:

Դրանից հետո Նիկոլ Փաշինյանն իր հարցը ուղղել է կոնկրետ ԱԺ նախագահ Հովիկ Աբրահամյանին և նշել, թե ԱԺ կանոնակարգը շատ հստակ սահմանում է, որ պատգամավորները հարցեր տալու հնարվորություն ունեն:

«Հիմա բարի եղեք ապահովել վարչապետի ներկայությունը: Կամ հրավիրեք, կամ, չգիտեմ, բերման ենթարկեք,  որպեսզի մենք հացեր տալու հնարավորություն ունենանք: Սենց չի կարելի աշխատել, իմ րոպեներից գնում է», – ասել է Փաշինյանը:

ԱԺ նախագահ Հովիկ Աբրահամյանը քիչ անց անդրադարձել է Նիկոլ Փաշինյանի բարձրացրած հարցին՝ նշելով, որ վարչապետը քաղաքական մասով  է խոսել: Նա ասել է, որ ԱԺ կանոնակարգ օրենքում նման իմպերատիվ պահանջ չկա:

«Այստեղ կառավարությունը մեկ դեմքով է հանդես գալիս: Հիմա կոռեկտ չի լինի, որ վարչապետը գա, հարցերին պատասխանի: Մյուս անգամ կհստակեցնենք ու կկազմակերպենք, որ բոլոր զեկուցողներին հարցեր ուղղեք», – ասել է ԱԺ նախագահը:

Նիկոլ Փաշինյանը, իր հերթին, նշել է, թե ինքն արձանագրում է, որ վարչապետը պիտի մնար ու իրենց հարցերին պատասխաներ, բայց չի մնացել: