Արդարադատության նախարարությունը գործել է ի շահ «Նաիրիտի». օմբուդսմենը պահանջում է վերացնել խախտումը

«Նաիրիտ» գործարանի նախկին աշխատակից Կարեն Իսրաելյանը դիմել է դատարան գործարանի կողմից տարիներ շարունակ իրեն չվճարված աշխատավարձի գումարը ստանալու համար։  Ինչպես հաղորդում է Մարդու իրավունքների պաշտպանի գրասենյակը, դատարանը կայացրել է բռնագանձնման վճիռ, որի հիման վրա  Դատական ակտերի հարկադիր կատարումն ապահովող ծառայությունը /ԴԱՀԿ/ կատարողական վարույթ է հարուցել։

«Արդյունքում արգելանք է դրվել գործարանին պատկանող գույքի վրա, այնինչ ըստ օրենքի արգելանքը պետք է դրվեր դրամական միջոցների վրա, ինչը ԴԱՀԿ ապահովող ծառայության առաջնահերթ պարտավորությունն էր: Հարկադիր կատարողների կողմից օրենքի հստակ պահանջի ակնհայտ խախտման հետևանքով էլ Կարեն Իսրաելյանին հասցվել է զգալի նյութական վնաս՝ առ այսօր նրան չի վճարվել 5 600 000  դրամ», – նշված է օմբուդսմենի գրասենյակի տարածած հաղորդագրության մեջ։

Կարեն Իսրաելյանը դիմել է Մարդու իրավունքների պաշտպան Կարեն Անդրեասյանին` խնդրելով նրա միջնորդությունը` պարտավորեցնել ԴԱՀԿ ապահովող ծառայությանը կատարել օրենքով սահմանված իր պարտավորությունը:

Պաշտպանը գրություններ է ուղարկել Արդարադատության նախարարություն՝ որպես ԴԱՀԿ ապահովող ծառայությունը վերահսկող մարմին, սակայն  Պաշտպանի միջնորդությանն ի պատասխան՝ Արդարադատության նախարարության կողմից այդպես էլ չի ապահովվել պարտապան ընկերության դրամական միջոցների վրա արգելանքի կիրառումը: Ըստ ՄԻ պաշտպանի՝ Արդարադատության նախարարությունը խախտել է օրենքը՝  գործելով ի շահ «Նաիրիտ» գործարանի:

Անդրեասյանն Արդարադատության նախարարությունից պահանջել է վերացնել Կարեն Իսրաելյանի իրավունքի խախտումը և միաժամանակ պատասխանատվության ենթարկել խախտումը թույլ տված հարկադիր կատարողներին: