Epress.am Լուրեր Հայաստանից
Տասնհինգ օրից Գագիկ Ծառուկյանը վերջապես կհայտնի նախագահական ընտրություններին մասնակցության իր ձևաչափի մասին, գրում է «Հրապարակ» օրաթերթը՝ հղում կատարելով ԲՀԿ-ի իր աղբյուրներին։
«Շեֆը կանգնած է բարդ ընտրության առաջ, ընդհանուր առմամբ նա դեմ չէ թեկնածու առաջադրվելուն, սակայն ասում է, որ հետևանքների համար չի կարող պատասխան տալ. չգիտի՝ ինչ կլինի։ Հետո էլ ասում է՝ հո ես մենակ չեմ, էլի մարդիկ կան, որոնց համար ես պատասխանատու եմ», – աղբյուրի խոսքերն է մեջբերում թերթը:
Ըստ աղբյուրի տեղեկությունների՝ Ծառուկյանը պատմել է, որ Սերժ Սարգսյանի հետ հանդիպումների ժամանակ ինքն ասել է՝ մենք հարյուր տոկոսով պատրաստ ենք պաշտպանել քեզ, մենակ թե դու մտածի՝ ոնց պիտի արվի, որ մենք ՕԵԿ չդառնանք։ Բացի դա, համաձայնության չեն եկել ապագա կառավարության կազմի վերաբերյալ. Ծառուկյանը կրկին պահանջել է վարչապետի պաշտոնը, նախագահն առաջարկել է փոխվարչապետով ու նախարարներով գոհանալ, Ծառուկյանն այս տարբերակին չի համաձայնել, և խոսակցությունը բաց է մնացել։
«Ենթադրվում է, որ համաձայնությունը կկայանա այդ 2 առաջարկների մեջտեղում ընկած տարբերակի տեսքով։ Իսկ քաղաքական կոնսուլտացիաները, արտահերթ նիստի ստորագրահավաքը հենց դրա համար են, որ ցույց տրվի՝ ԲՀԿ-ն առանցքային ուժ է, և վերջում հայտարարվի՝ քանի որ կա Ղարաբաղի, տարածաշրջանի, Իրանի հարց, ԲՀԿ-ն ստիպված է երկրի նախագահին պաշտպանել: «Էս դեպքում էլ Ծառուկյանը հասկանում է, որ Քոչարյանի թիմը մեր մոտից դուրս կգա»,– կարծում են ծառուկյանական թևի կուսակցականները։ Այնուհանդերձ, մեզ հետ զրույցներից մեկում Քոչարյանի թիմի ներկայացուցիչ համարվող Վարդան Օսկանյանն ասել էր, որ ինչպես կուսակցությունը որոշի, ինքն այդպես էլ կվարվի և դուրս չի գա, եթե անգամ որոշումն առնչվի Սերժ Սարգսյանին պաշտպանելուն. «Հարցը խելամիտ զիջումներին է վերաբերում»», – գրում է թերթը: