Epress.am Լուրեր Հայաստանից
Հայ Ազգային Կոնգրեսի ակտիվիստ Վարդգես Գասպարին Ֆեյսբուքի իր էջում գրել է, որ իր բոլոր մարտընկերները, այդ թվում՝ ՀԱԿ համակարգող Լևոն Զուրաբյանը, իրավասու են այս կամ այն հարցում իրեն հորդորել, և որ իր ինքնասիրությունը դրանից չի պակասում:
Բանն այն է, որ երեկ Aravot.am-ի թղթակիցը նկատել էր, որ Գասպարիի ցուցապաստառներից, որտեղ փակցված են գործարար պատգամավորների լուսանկարներ, անհետացել է ԲՀԿ առաջնորդ, օլիգարխ Գագիկ Ծառուկյանի նկարը, որը ակտիվիստը ավելացրել էր նախորդ շաբաթ:
Ծառուկյանի լուսանկարի անհետանալը Վարդգես Գասպարին բացատրել էր նրանով, որ իրեն հորդորել է Լևոն Զուրաբյանը: «Ես էլ, որպես ՀԱԿ-ի անդամ, նաև իր վստահված անձ, իր հորդորը լսեցի», ասել էր Գասպարին:
Դիտարկմանը՝ թե ինքը որպես ազատ քաղաքացի իր կարծիքն արտահայտելու իրավունք ունի, Գասպարին պատասխանել էր. «Այո, համաձայն եմ, բայց նաև՝ ՀԱԿ-ի անդամ»: Հարցին, թե արդյոք Գասպարին ենթարկվեց Զուրաբյանին՝ ակտիվիստը պատասխանել էր. «Չենթարկվեցի, ընդունեցի իր հորդորը: Չեմ կարծում, որ որևէ մեկը կարողանա ինձ ենթարկեցնել»: Գասպարին նշել է, որ իր կարծիքը Գագիկ Ծառուկյանի մասին, ամեն դեպքում, չի փոխվել:
Aravot.am-ի հետ զրույցում Լևոն Զուրաբյանը հայտնել էր, որ ինքը Գասպարիին նման բան չի ասել:
«Չի կարող պատահի, որ ես իրեն…ես իրեն…ո՞նց կարող է պատահի: Ես նման բան չեմ ասել, ինքն էլ հանե՞լ է: Չհասկացա, այսինքն ինքը ինձ ընդունում է, որ ես դիկտատո՞ր եմ: Ոչ մի նման բան ես չեմ ասել: Կներեք: Կարող է ինքը սխալ է հասկացել: Ես նման բան չեմ ասել, որովհետև դա իմ գործը չի ընդհանրապես: Ես ընդհանրապես նման բաների մեջ երբեք չեմ խառնվել», – ասել էր Զուրաբյանը:
Գասպարին իր ֆեյսբուքյան էջում 4 պարզաբանում է ներկայացրել.
«Պարզաբանում առաջին. Ես Լ. Զուրաբյանին գիտեմ 90-ականների սկզբից և արդեն մոտ երկու տասնամյակ համակրում եմ նրան, որպես ուսյալ, բարեկիրթ և բարոյական նկարագրով քաղաքական գործիչ: Ինձ երբևէ քաղաքական ֆիգուր չհամարելով, լինելով պարզապես քաղաքացի և իրավապաշտպան, ինձ համարում եմ նրա համախոհը և թիմակիցը:
Պարզաբանում երկրորդ – Ով` ով, բայց Լ. Զուրաբյանը, Ա. Մանուկյանը, Ն. Փաշինյանը և առհասարակ իմ բոլոր մարտընկերները իրավասու են այս կամ այն հարցում ինձ հորդորել, և երբևէ իմ ինքնասիրությունը չի պակասում դրանից:
Պարզաբանում երրորդ – Վերոհիշյալով ես երբևէ չեմ հերքում կամ հաստատում Լ. Զուրաբյանի հասցեին արվող քննադատությունները. ամեն ոք թող ինքը հիմնավորի իր քննադատությունը: Ոչ էլ ես ցանկանում եմ Լ. Զուրաբյանին անթերի անձնավորություն ներկայացնել:
Պարզաբանում չորրորդ – Ես 88-ից ի վեր ինձ համարում եմ այն քաղաքական թիմի համախոհը, որը ներկայացնում է Լ. Զուրաբյանը: Մասնավորապես, ինձ պատասխանատու եմ համարում մեր իշխանության տարիներին թույլ տրված սխալների և բաց թողումների համար»: