Հայաստանում կբացվի «Ռոսգրանիցա»-ի առաջին ներկայացչությունը

ՀՀ վարչապետ Տիգրան Սարգսյանն ընդունել է նոյեմբերի 27-29-ը պաշտոնական այցով Երևան ժամանած Ռուսաստանի Դաշնության պետական սահմանի դաշնային գործակալության («Ռոսգրանիցա») ղեկավար Դմիտրի Բեզդելովի գլխավորած պատվիրակությանը:

Ինչպես հաղորդում է ՀՀ կառավարության կայքը, զրուցակիցները քննարկել են Հայաստանում ՌԴ պետական գործակալության ներկայացուցչության բացման հարցը, որը կլինի «Ռոսգրանիցա»-ի առաջին ներկայացուցչությունը:

Բեզդելովը խոսել է իր ղեկավարած կառույցի գործունեության ռազմավարական նպատակների և գործառույթների մասին: Նա նաև մանրամասներ է ներկայացրել այսօր պետական սահմանի տեղամասեր կատարած այցի վերաբերյալ: Երկուստեք ընդգծվել է, որ ռուսական խոշորագույն գործակալության հիմնումը կնպաստի սահմանային ենթակառուցվածքների և անցման կետերի արդիականացման աշխատանքների արդյունավետ իրականացմանը:

Սարգսյանը նշել է, որ Հայաստանը շահագրգռված է գործակալության ներկայացուցչության բացման հարցում և պատրաստ է աջակցել վերջինիս` իր առաքելության իրականացման գործում:

«Ռոսգրանիցա»-ի պաշտոնական կայքի համաձայն՝ ներկայացուցչությունն իր աշխատանքը կսկի 2013 թվականից: