Epress.am Լուրեր Հայաստանից
Երեկ Ազգային ժողովում ընդունված 2013 թվականի պետական բյուջեում Կառավարությունն այդպես էլ չներառեց Մարդու իրավունքների պաշտպանի աշխատակազմի համար առաջարկված 11 մլն դրամի հավելումը, որն անհրաժեշտ էր փակ հաստատություններում խոշտանգումների և բռնությունների կանխարգելման համար: Այս մասին ասված է ՀՀ Մարդու իրավունքների պաշտպանի գրասենյակի տարածած հաղորդագրության մեջ:
«Այդ սիմվոլիկ հավելումը ծայրահեղ անհրաժեշտ էր թե´ միջազգային պարտավորությունների, և թե´ մեր մարդկանց առջև պարտավորությունների կատարման համար։
Պաշտպանի բյուջեի հավելման այդ հայտը հիմնավոր էր ճանաչվել նաև Ազգային Ժողովի համապատասխան մշտական հանձնաժողովի կողմից։ Եվ, չնայած դրան, Կառավարությունը նույնիսկ այդ 11 մլն դրամով մարդու իրավունքների պաշտպանությանը նպաստելը չհամարեց առաջնահերթ մեր պետության և հասարակության համար։
Պետության կողմից Մարդու իրավունքների պաշտպանին անհրաժեշտ ֆինանսավորում չապահովելը ոչ միայն չի նպաստում մարդու իրավունքների պաշտպանության վիճակի բարելավմանը Հայաստանում, այլև ակնհայտորեն բացասաբար է անդրադառնում Հայաստանի Հանրապետության հեղինակության վրա միջազգային տարբեր ատյաններում։
Ի հեճուկս ՀՀ Կառավարության կողմից որդեգրված նման վերաբերմունքի, մենք 2013 թվականին շարունակելու ենք մեր ակտիվ, հետևողական, ապաքաղաքական, մարդակենտրոն և հանրօգուտ ծառայությունը՝ օգտագործելով քաղաքացիների լիարժեք պաշտպանության համար մեր տարբեր գործընկերների միջոցներով հայթայթած ռեսուրսները, որոնք զգալիորեն համալրում են մեր ունեցած պետական ֆինանսավորումը», – նշված է հայտարարության մեջ։
Օմբուդսմեն Կարեն Անդրեասյանն իր խորին հիասթափությունն ու մտահոգությունն է հայտնել: Նա ակնկալում է, որ 2014 թվականի բյուջեն էականորեն կտարբերվի մարդու իրավունքների պաշտպանության նկատմամբ որդեգրած իր առաջնահերթություններով։
Հայտարարության հետգրության մեջ ՄԻ պաշտպանի գրասենյակը նշում է, որ ՀՀ կառավարության աշխատակազմին բյուջեով տրվել է 10 անգամ ավելի գումար, քան իրենց կողմից պահանջված 11 միլիոնն է, «Կառավարության գործունեության գնահատման, կյանքի որակի և համայնքային կարիքների գնահատման հետազոտության» համար։
«Այսինքն՝ Պաշտպանի տարեկան բյուջեն 176 մլն դրամ է, իսկ նշված հետազոտության բյուջեն՝ 106 մլն դրամ, ինչն էլ նշանակում է՝ Պաշտպանի մեկ տարվա ֆինանսավորումը գրեթե հավասար է կառավարության «գործունեության գնահատման» հետազոտության բյուջեին», – հավելում է օմբուդսմենը: