«Անձերի խնդիր չկա». ՀՅԴ-ն՝ ընդդիմության միասնական թեկնածուի մասին

Այս պահին լուրջ հարց կա՝ արդյոք արժի մասնակցել 2013-ի նախագահական ընտրություններին: Այս մասին այսօր ՀՀ ԱԺ-ում հայտարարել է ՀՅԴ խմբակցության պատգամավոր Արմեն Ռուստամյանը՝ պատասխանելով հարցին՝ ինչու «Դաշնակցությունը» չի կողմնոչրոշվել, թե ինչ ձևաչափով է մասնակցելու 2013-ի նախագահական ընտրություններին:

Ռուստամյանը նշել է, որ իրավիճակը 2008-ին և հիմա տարբեր է:

«Այսօր ժողովրդի մոտ չկա վստահություն ընտրությունների հանդեպ», – նշել է քաղաքական գործիչը:

Նրա խոսքով՝  ժողովրդի վստահությունը վերականգնելու մի տարբերակ կա. համախմբվել միասնական քաղաքական օրակարգի շուրջ:

«Եթե բոլորը կարողանան պայմանավորվել օրակարգի շուրջ, ապա առաջնորդի հարցը ինքստինքյան կորոշվի: Իսկ նրանք, ովքեր այդ դեպքում միասնական թեկնածուին դեմ կլինեն… նրանց դիմակը կպատռվի», – նշել է Ռուստամյանը:

Պատասխանելով այն հարցին, թե արդյոք այդ միասնական թեկնածուն կարող է լինել ԲՀԿ առաջնորդ Գագիկ Ծառուկյանը, Ռուստամյանը նշել է, որ դա կարող է լինել յուրաքանչյուրը՝ «անձերի խնդիր չկա»: