Հայաստանում ճանապարհները հիմնականում անցանելի են. Լարսը բեռնատարների համար փակ է

Դեկտեմբերի 17-ին, ժամը 09.00-ի դրությամբ Հայաստանում բոլոր ավտոճանապարհները հիմնականում անցանելի են, հաղորդում է ՀՀ ԱԻ նախարարությունը: Նշենք, որ երեկ հանրապետության տարբեր հատվածներում առատ ձյուն է տեղացել:

Համաձայն պաշտոնական տեղեկատվության, դժվարանցանելի են Սելիմի լեռնանցքը, Արարատ-Եղեգնաձոր ավտոճանապարհի Տիգրանաշեն գյուղի հատվածը, Բերդ-Ճամբարակ, Սևան-Ճամբարակ ավտոճանապարհները, ինչպես նաև Վանաձոր-Ալավերդի ավտոճանապարհի «Սատանի կամուրջ» կոչվող հատվածը:

Որոշ ճանապարհահատվածներում տեղ-տեղ առկա է մերկասառույց: Այս պահին կատարվում են ճանապարհների մաքրման և մշակման աշխատանքներ:

Վրաստանի ՆԳՆ ԱԻ դեպարտամենտից ստացված տեղեկատվության համաձայն` Ստեփանծմինդա-Լարս ավտոճանապարհը բաց է միայն թեթև մարդատար տրանսպորտային միջոցների և մինչև 30 տեղանոց միկրոավտոբուսների համար: